Federata Shqiptare e Futbollit, i shpreh Federatës së Kosovës dhe nëpërmjet saj edhe familjes, ngushëllimet më të thella për ndarejn nga jeta të Fadil Vokrrit.
Në moshën 57-vjeçare, i lindur me 23 qershor 1960, ka ndërruar jetë presidenti i Federatës së Futbollit të Kosovës, Fadil Vokrri.
Fadil Vokrri është më meritori që sot Kosova është e pranuar në UEFA e FIFA dhe luan e barabartë me të gjitha shtetet tjera në gara të ndryshme ndërkombëtare.
Ai ishte ndër lojtarët më të pëlqyer të ish Jugosllavise në fund të viteve tetëdhjeta. Vokrri ishte shpallur futbollist viti, ne vitin 1986 në ish Jugosllavi, dhe ishte kërkuar nga Juventusi.
FSHF ngushëllon popullin e Kosovës për ndarjen nga jeta të parakohshme të Fadil Vokrrit:
Federata Shqiptare e Futbollit ndihet thellësisht e tronditur dhe e shokuar nga ndarja e parakohëshme nga jeta e mikut, dhe kolegut të saj, kreut të Federatës së Futbollit të Kosovës, z.Fadil Vokrri.
Në emër të Presidentit të FSHF-së, z.Armand Duka, sekretarit të përgjithshëm z.Ilir Shulku, si edhe të gjithë anëtarëve të Komitetit Ekzekutiv të FSHF-së, komuniteti i Futbollit në Shqipëri përcjell ngushëllimet më të thella e më të sinqerta për familjen, të afërmit, miqtë, spordashësit dhe mbarë qytetarët e Kosovës për këtë ndarje tragjike e të parakohëshme nga jeta të zotit Vokrri, që vuri gjithcka në dispozicion të rritjes dhe zhvillimit të Futbollit në Kosovë.
Kontributi i Presidentit Vokrri do të mbahet mend shumë gjatë për angazhimin e tij maksimal dhe gjithpërfshirës në drejtim të ngritjes dhe përfaqësimit ndërkombëtar të Kosovës dhe Futbollit të saj, në Europë dhe në Botë.
FSHF është e bindur që fizionomia dhe idetë e tij për progresin e Futbollit të Kosovës, në rang kombëtar dhe ndërkombëtar do të ndiqen dhe elaborohen ndër vite nga brezat dhe kolegët e FFK-së.
Ndarja e tij e parakohëshme nga jeta mbetet një humbje shumë e madhe për futbollin kosovar, por edhe për të gjitha trevat shqipfolëse anembanë botës.
Lamtumirë miku ynë Fadil!
Shpirti yt u prehtë në paqe!
