Pas një viti me kritika të shkëputura ndaj qeverisë, por pa një pozicionim të qartë në opozitë, kryetari i PDIU Shpëtim Idrizi duket se ka zgjedhur të jetë kundërshtar i mazhorancës.
Ai ka shpërthyer në akuza ndaj kryeministrit Rama që sipas tij iu përul Greqisë duke sulmuar partinë e çamëve për t’i vjedhur mandatet.
“Nuk na mundi dot Enver Hoxha, dhe nuk na mundin dot fantazmat e hashashit”, tha ai.
“Ne dëgjuam shokun Rama apo zotin Basha që harxhuan lekë për të bërë foto me Donald Trump. Nuk janë pak për të rrëfyer në Kongresin amerikan tragjedinë e Çamërisë”, tha Idrizi.
Gjatë fjalës së tij në Këshillin Kombëtar të PDIU, Idrizi tha se partinë e tij tentuan që ta zhduknin, ndërsa përmendi edhe zgjedhjet e kaluara.
Mes të tjerash ai tha se çështja çame nuk është më pjesë e programit të qeverisë.
“Sido që të marrin votat, të na marrin mandatet, nuk mund të zhbëjnë se nga veriu në jug, do na kenë si një thumb, ngulur në trurin e tyre. Nuk e prishin dot këtë lëvizje, pasi kjo është partia e madhe. Ata mund të vjedhin mandatin e Idrizit, Takut, Mesilës, por nuk e vjedhin dot misionin tonë. Se vjedhin dot Çamërinë, sado që të flasësh për të, sado të përbetohesh për të. Pas një viti që u krye ai turp, siç ishin zgjedhjet, pasojat janë këto. Ata tentuan të lënë jashtë Kuvendit PDIU. Jo vetëm për të patur tepsinë me veten, por u bë e qartë kur çështja çame nuk përfshihet në programin e qeverisë”, tha Idrizi./a.m.
