Një tjetër humbje në radhët e figurave të vjetra të sportit shqiptar. Pas ndarjes nga jeta të Esat Rakiqit dhe Gëzim Kasmit pak ditë më parë, në orët e para të mëngjesit ka ndërruar jetë edhe ish-kapiteni i Partizanit dhe ish-futbollisti i kombëtares, Safet Berisha. Klubi i Partizanit ka bërë një njoftim ngushëllues në faqen zyrtare në Facebook ku thuhet se Berisha humbi jetën pasi kohët e fundit vuante nga një sëmundje e rëndë. Ai po jetonte në shtetin fqinj të Italisë, në qytetin e Arecos.
Njoftimi i plotë i Partizanit
“NGUSHELLIM
Klubi njofton me hidhërim të thellë se sot në orët e para të mëngjesit është ndarë nga jeta në moshën 66-të vjeçare ish futbollisti i njohur i viteve 1968-1983 Safet Berisha. Ish kapiteni legjendar i Partizanit dhe antar i ekipit tonë përfaqësues, vuante së fundi nga një sëmundje e rëndë në shtetin fqinj Itali në qytetin e Arecos .
Klubi i Futbollit Partizani i shpreh ngushëllimet më të sinqerta familjes dhe të afërmve për humbjen e njeriut të tyre më të dashur. Safet Berisha i lindur në Durrës në 11 nëntor 1949 ka qenë një prej qendërmbrojtësve emblemë të Partizanit dhe ekipit tonë Përfaqësues. Me fanelën e Partizanit,Berisha koleksionoi 3 Tituj kampionë , 4 Kupa Republike, dhe fitues i Kupës Ballkanike në vitin 1970. Berisha shënon edhe 21 prezenca në radhët e ekipit tone Kombëtar . Në vitin1978 Safet Berisha është vlerësuar edhe me Titullin“Mjeshtër i Merituar i Sportit”, si dhe në 70-të Vjetorin e Themelimit të Klubit u dekorua me “Medaljen e Meritës”.”
