Dje u nda nga jeta një nga figurat e shquara të Luftës Antifashiste Nacionalçlirimtare dhe të Ushtrisë Shqiptare, Sul Domi.
Në moshë fare të re ai iu bashkua luftës për çlirimin e vendit nga pushtuesit nazifashistë. Këtë luftë ai mbrojti me përkushtim të rrallë deri në fundin e jetës, duke qenë dhe një nga veteranët më aktivë dhe nënkryetar i Komitetit Kombëtar të Veteranëve të LANÇ-it për shumë vite.
Ja si e ka shprehur ai qëndrimin për luftën antifashiste në një intervistë të para disa viteve, duke folur për krijimin e Shtabit të Përgjithshëm të Ushtrisë më 10 korrik 1943, 75-vjetori i të cilit do të kremtohet pas pak ditësh:
“Krijimi i Shtabit të Përgjithshëm të Ushtrisë në Labinot të Elbasanit ishte një ngjarje e rëndësishme që do të përcaktonte dhe fatin e luftës Nacionalçlirimtare e çlirimin e vendit. Në fillim të korrikut 1943 situata politiko-ushtarake, e brendshme dhe e jashtme në Shqipëri, ishte krejtësisht në favor të Luftës NaÇl të popullit shqiptar, e cila pas Konferencës historike të Pezës kishte marrë masa të gjëra dhe ishte gjithnjë në rritje, drejt kthimit të saj në Kryengritje të Përgjithshme Popullore kundër pushtuesit fashist italian. Barrën e rëndë të bashkimit të popullit shqiptar në një front të vetëm dhe hedhjen e tij totalisht në luftën për çlirimin e plotë të atdheut e mori përsipër PKSh, e vetmja forcë politike që merrte përsipër një mision të tillë”, ka deklaruar Sul Domi shkruan Dita.
Pas luftës, Sul Domi ka mbajtur detyra të rëndësishme e përgjegjësi të larta shtetërore. Ka qenë ushtarak madhor në Ministrinë e Mbrojtjes, shef shtabi dhe komandant i përgjithshëm i Artilerisë i Republikës nga viti 1965 deri më 1982.
Ka qenë në katër legjislatura (1970-1984) deputet në Kuvendin Popullor si përfaqësues i rrethit të Matit.
Homazhet për nder të Sul Domit do të zhvillohen sot nga ora 10 deri në 11 në Muzeun e armëve të Ministrisë së Mbrojtjes, nga ku do të bëhet edhe përcjellja për në banesën e fundit në varrezat e Sharrës në orën 12.
Redaksia e JavaNews i shpreh ngushëllimet më të sinqerta familjes./a.m.
