Rusia nisi një valë sulmesh me dronë dhe raketa në mbarë Ukrainën të mërkurën në mbrëmje, duke vrarë të paktën 13 persona.
BBC shkruan se një djalë 12-vjeçar ishte mes pesë viktimave në kryeqytet, sipas Shërbimit të Emergjencës së Ukrainës. Dy persona u vranë në qytetin juglindor Dnipro, ndërsa sulmet me raketa dhe dronë në Odesa vranë gjashtë persona.
Përtej kufirit, dy fëmijë, të moshës pesë dhe 14 vjeç, u vranë në një sulm me dronë ukrainas në rajonin jugor Krasnodar Krai të Rusisë, tha guvernatori Veniamin Kondratyev në Telegram.
Këto ishin sulmet më të fundit pas një armëpushimi të shkurtër që përkoi me festimet e Pashkëve Ortodokse gjatë fundjavës, kohë gjatë të cilit të dyja palët akuzuan njëra-tjetrën për qindra shkelje
Kryetari i Kievit, Vitali Klitschko, shkroi në Telegram se përveç viktimave në kryeqytet, ekipet e shpëtimit nxorën një nënë dhe fëmijën e saj nga rrënojat e një ndërtese banimi 16-katëshe që u shemb në distriktin qendror Podilsky të Kievit.
Në veri të kryeqytetit, katër punonjës të urgjencës mjekësore ishin mes të plagosurve si rezultat i bombardimeve të përsëritura.
Në një sulm në qytetin qendror Dnipro, dy persona u vranë dhe të paktën 10 u plagosën, shkroi Oleksandr Ganzha, kreu i administratës rajonale, në Telegram. Fotot e postuara online tregonin ndërtesa të përfshira nga flakët në qytet.
Ndërkohë, sulmet me raketa dhe dronë në qytetin port të Odesa-s vranë gjashtë persona. Kështu shkroi në Telegram kreu i administratës ushtarake të qytetit, Sergiy Lysak.
Edhe në Kharkiv, një sulm me dron plagosi një grua 77-vjeçare dhe një burrë 66-vjeçar.
Lufta në Ukrainë është tani në vitin e saj të pestë dhe ka pasur disa raunde bisedimesh paqeje, me SHBA-të që vepron si ndërmjetës.
Megjithatë, procesi është bllokuar që kur presidenti i SHBA-ve, Donald Trump, e zhvendosi fokusin e tij tek lufta në Lindjen e Mesme.
Ajo që Ukraina ka propozuar vazhdimisht është një armëpushim i plotë dhe i qëndrueshëm si hap i parë drejt negociimit të një fundi të qëndrueshëm të pushtimit rus.
Por Moska këmbëngul të arrihet marrëveshja e paqes fillimisht, duke nxitur akuza nga Kievi se Rusia nuk është serioze për t’i dhënë fund luftimeve.
