Të paktën tetë persona janë vrarë dhe 33 të tjerë janë plagosur pas një vale sulmesh me raketa ruse gjatë natës në Kiev dhe rajonin përreth. Sulmet shkaktuan dëme të konsiderueshme në disa zona të kryeqytetit ukrainas, pasi u goditën blloqe apartamente, depo, spital fëmijësh dhe një shkollë. Shërbimi Shtetëror i Emergjencave të Ukrainës (DSNS) e cilësoi sulmin si masiv. Sakaq, ekipet e emergjencave vijojnë kërkimet nën rrënoja, ndërsa autoritetet po përpiqen të nxjerrin të mbijetuarit nga ndërtesat e dëmtuara.
Ndërkohë, Rumania raportoi se një dron hyri në hapësirën e saj ajrore pranë kufirit me Ukrainën, duke aktivizuar alarmet ajrore. Ministria rumune e Mbrojtjes deklaroi se droni hyri rreth 13 kilometra në lindje të qytetit të Galațit dhe më pas u rrëzua në një zonë të pabanuar, ku shkaktoi një zjarr të vogël. Sipas autoriteteve rumune, nuk pati viktima apo dëme materiale, ndërsa alarmi ajror u hoq më vonë.
Edhe Polonia ndërmori masa mbrojtëse, duke njoftuar nisjen e “operacioneve ajrore mbrojtëse” për të siguruar hapësirën e saj ajrore. Polonia ndan një pjesë të kufirit të saj juglindor me Ukrainën dhe në të kaluarën ka aktivizuar avionët luftarakë dhe sistemet e mbrojtjes ajrore gjatë sulmeve të mëdha ruse pranë territorit të saj.
