Pavarësisht përpjekjeve për ta paraqitur në publik LSI si një forcë politike unitare, me pozicionimin e saj si forcë politike që pretendon se është e majtë në krah të Berishës dhe Bashës, duket se në të vërtetë ujrat brenda kësaj partie nuk janë aq të qeta. Vetëm pak orë më parë u bë publik fakti se disa këshilltarë bashkiak të LSI i janë larguar kësaj force politike dhe i janë bashkangjitur PS. Në ditët që vinë pritet të ketë edhe largime të tjera në disa bashki të vendit. Si të mos mjaftonin këto, LSI ka larguar nga nënkomisioni për zgjedhjen e anëtarëve të KLGJ dhe KLP edhe deputetin e saj Nasip Naço, ish- ministër i Drejtësisë, duke e zëvendësuar këtë të fundit me Silvana Cakën. Për Naçon kjo është hera e dyrë që ai “bie viktimë” e reformës në Drejtësi, një herë kur ajo hartohej dhe Naço ishte ministër, dhe sot hera e dytë kur nis nga zbatimi i reformës. Pa dhënë shume shpjegime Naço u largua nga posti i Ministrit të Drejtësisë, duke u zëvendësuar nga Ylli Manjani, një kundërshtar ‘pa dorashka’ i Refomës në Drejtësi. Personazh që solli jo pak andralla gjatë kohës që hartohej dhe miratohej Reforma në Drejtësi.
Në periudhën kur u largua Naço zëra të besueshëm bënë të ditur se ai u hoq si Ministër Drejtësie, pasi si jurist, nuk mund të zbatonte streategjinë e krerëve të LSI për të bllokuar ose shtyrë në pafundësi hartimin e Reformës në Drejtësi. Por duket se për Nasip Naçon ‘koha s’ka qenë e kthjellët’ as pas vendosjes së tij në komisionin ad hock, lidhur me kandidatët për në KLGJ e KLP. Mosmarrëveshjet me lidershipin e LSI duket se kanë çuar në vendimin e Kryemadhit për të larguar Naçon dhe për ta zëvendësuar atë me Cakën. Këto lëvizje nga ana tjetër janë dhe dëshmi se paqja unitare brenda LSI me të cilën e drejtoi Meta për vite me rradhë është krisur. Pozicionimi i Kryemadhit në krah të Berishës dhe të Bashës është një fakt që nuk mund të gëlltitet aq lehtë, sidomos nga elektorati i majtë. Kjo u pa edhe në mitingun e 27 janarit kur në kohën që fliste Basha anëtarët e LSI ikën nga mitingu. Kjo aleancë e sforcuar dhe thjeshtë për interesa personale të krerëve të kësaj aleance nuk mund të prodhojë asnjë rezultat pozitiv dhe parashikohet që të jetë me pasoja afatgjatë për vetë LSI. Një ‘martesë’ e nisur keq që në fillim të tillë do ta ketë edhe vazhdimin, duke e bërë edhe ‘divorcin’ të pavlerë.
a.meta/ javanews.al
Nasip Naço për të dytën herë ‘viktimë’ e Reformës në Drejtësi nga LSI
