Ndërsa Bashkia e Tiranës ka nisur aksionin për lirimin e hapësirave të zaptuara publike dhe kthimin e tyre qytetarëve, ish-kryeministri Fatos Nano nuk i bindet aktit administrativ për të liruar ambientet e zëna prej vitesh në stadiumin “Selman Stermasi”.
Pasi është njoftuar për prishjen e kontratës për shkak se ambienti nuk shfrytëzohej për qëllimin për të cilin ishte marrë, çifti Nano me Joy Travel dhe restorant Pulëbardhën i janë drejtuar gjykatës për të kundërshtuar vendimin e marrë nga Bashkia e Tiranës.
Në të njëjtën kohë, Bashkia e Tiranës ka liruar hapësirat përreth stadiumit si dhe një ambient që përdorej nga një ish-deputet i Partisë Demokratikë për shitjen e makinave. Kjo hapësirë e liruar po transferohet në një parking publik të Bashkisë.
Mësohet se të vetmet ambiente që nuk lirohen janë ato të zëna nga Fatos Nano dhe bashkëshortja e tij, që nuk pranojnë të lëshojnë ambientet publike që do të vendosën në dispozicion të qytetarëve të Tiranës.
Vetëm pak ditë më pare, tifozët e sport Klub Tirana protestuan ndaj zënies së hapësirave publike dhe rreziku që sillte përdorimi i tyre për shkak të bombulave të gazit që janë të vendosur ngjitur me vendin ku rrinë tifozët.
