Ministri i Drejtësisë Nasip Naço në një dalje për mediat bëri të ditur vendimin e KLD për pezullimin e dy gjyqtarëve Osman Aliu dhe Dhimitër Pojanaku, ndërsa përsëriti kërkesën e tij drejtuar Presidentit Bujar Nishani që të emërojë nënkryetarin e KLD-së.
Sipas tij me vendimet e sotme të KLD-së për pezullimin e gjyqtarit të Kavajës, Osman Aliu dhe shkarkimin nga detyra për gjyqtarin e Pogradecit, Dhimitër Pojanaku, kthyen integritetin e këtij institucioni.
“Ka rënë në vesh të shurdhër kërkesa ime. Presidentit i bëj thirrje të emërojë zëvendës kryetarin e KLD. Ky këshill duhet të funksionojë normalisht”, tha ministri Naço.
Megjithatë për ministrin Naço sërish KLD vepron i cunguar pa nënkryetarin, post i lënë bosh që prej shkarkimit të Elvis Çefës nga Kuvendi. Së fundmi Çefa fitoi betejën ligjore në Gjykatën Kushtetuese dhe kërkon rikthimin e tij në detyrë.
“Në këto vite në nuk kemi patur gjyqtarë në bankën e të akuzuarve. Jemi të vendosur që të vëmë përpara drejtësisë të gjithë ata që shkelin ligjin. Ne mendojmë që në çdo rast korrupsioni duhet të dënohet për çdo vlerë, qoftë e vogël apo e madhe. Po të shihni deklaratat e pasurive të këtyre gjyqtarëve do shihni se as shifrat se sa pasuri kanë nuk dinë ta plotësojnë”, deklaroi ministri Naço
Redaksia Online
(JavaNews.al)
