Kryeministri i Kosovës Isa Mustafa dhe ai i Serbisë, Aleksandar Vuçiç pritet të takohen të martën në Bruksel me ftesë të Përfaqësueses së Lartë të Bashkimit Evropian për Siguri dhe Politikë të Jashtme Federica Mogherini.
Kryeministri i Kosovës, Isa Mustafa pritet të marrë pjesë në takimin për Ballkanin Perëndimor që mbahet në Bruksel, i njohur ndryshe edhe si “Procesi i Berlinit”.
Ndërkaq më pas, Mustafa dhe Vuçiç në takimin që do të ndërmjetësohet nga Mogherini, pritet të vazhdojnë diskutimin rreth zbatimit të deritashëm të marrëveshjeve dhe agjendën e dialogut për të ardhmen.
Këshilltari i kryeministrit Mustafa për çështje të jashtme, Valon Murtezaj, ka thënë për mediat kosovare se temë qendrore e takimit pritet të jetë çështja e Telekomit.
Në këtë temë, pala nga Prishtina pret që të arrihet përfundimisht marrëveshja.
“Në fokus të këtij takimi, do të jenë bisedimet në lidhje me Telekomin. Pra, kjo është një çështje më e specifikuar. Por, gjithashtu do të ketë edhe bisedime në lidhje me temat e ardhshme apo temat e mundshme në kuadër të takimeve të ardhshme ndërmjet dy kryeministrave”, ka thënë Murtezaj.
Në anën tjetër, edhe kryeministri i Serbisë, Aleksandar Vuçiç, kishte komentuar takimin e tij të radhës me kryeministrin e Kosovës.
Sipas tij, si takimi me Mustafën ashtu edhe ai me kryeministrin e Shqipërisë Edi Rama nuk janë të lehta, por është zotuar se politika serbe do të ndërtohet mbi parimet e marrëveshjeve dhe jo konfrontimeve.
“Është punë e jona që të bisedojmë dhe të vijmë deri te marrëveshjet. Punë e jona është që të ndërtojmë rrugë e ura, e jo t’i rrënojmë ato. Por, Serbia gjithmonë do të ruajë shtetin dhe territorin e vetë”, ka thënë Vuçiç.
Redaksia Online
(Javanews.al)
