Tregu i punës në Shqipëri po tregon shenja stabiliteti, por edhe ndryshime në strukturë. Të dhënat më të fundit të Institutit të Statistikave tregojnë se në fund të vitit 2025, papunësia zbriti në 8.3 për qind, një nivel pak më i ulët krahasuar me një vit më parë.
Në të njëjtën kohë, shkalla e punësimit arriti në rreth 58.5 për qind, duke u rritur lehtë në krahasim me vitin 2024.
Këto shifra zbulojnë edhe një ndryshim në strukturën e ekonomisë. Punësimi po mbahet kryesisht nga sektori i shërbimeve, ndërsa bujqësia dhe industria kanë shënuar rënie në krahasim me një vit më parë.
Ndërkohë, edhe pagat kanë vijuar të rriten. Sipas INSTAT, paga mesatare mujore bruto arriti në gati 87 mijë lekë në tremujorin e katërt të vitit 2025, rreth 4.3 për qind më shumë se një vit më parë.
Sektorët me pagat më të larta mbeten financat dhe sigurimet, me mbi 173 mijë lekë në muaj, të ndjekura nga informacioni dhe komunikacioni, ku paga mesatare kalon 131 mijë lekë.
Të dhënat tregojnë gjithashtu një zhvendosje të punonjësve drejt niveleve më të larta të pagës. Pesha e atyre që paguhen mbi 120 mijë lekë është rritur në mbi 16 për qind, ndërsa numri i punonjësve me paga shumë të ulëta ka rënë.
