“Kosova synon që të bëhet sa më parë pjesë e Organizatës Botërore të Shëndetësisë”, theksoi kryeministri i Kosovës, Isa Mustafa, sot gjatë punimeve të konferencës së parë rajonale “Promovimi dhe Edukimi Shëndetësor: Nga politika në praktikë, nga praktika në politikë”.
Në konferencën e organizuar nga Instituti Kombëtar i Shëndetësisë Publike të Kosovës, në bashkëpunim me Fakultetin e Mjekësisë të Universitetit të Prishtinës dhe nën patronazhin e qeverisë kosovare, ishin të pranishëm kryeministri i Kosovës, Isa Mustafa, drejtori ekzekutiv i IKSHP-së Naser Ramadani, dkani i FM, Salih Ahmeti dhe U.D. i Koordinatorit Zhvillimor të OKB-së, Alesandra Rocassalvo, përfaqësues të vendeve rajonale etj.
Kryeministri Mustafa tha se “ky institut ka luajtur rol të rëndësishëm në parandalimin e sëmundjeve ngjitëse. Shëndeti është shumë i rëndësishëm për ne, prandaj së bashku me zhvillimin ekonomik dhe arsimin janë prioritetet e programit qeveritar”. Ai premtoi se për këtë institucion nuk do të mungojë përkrahja e qeverisë.
Kurse, drejtori i Institutit Kombëtar të Shëndetësisë Publike, Naser Ramadani, u shpreh se rëndësia në promovim e shëndetit është kryesore për institucionet e Kosovës. Sipas tij, sukseset e arritura nuk do të arriheshin pa ndihmën e Ministrisë së Shëndetësisë.
“Do të jemi të angazhuar për luftimin e sëmundjeve ngjitëse”, tha ai. Kjo konferencë do të mbahet nga sot e deri të dielën./Kosovapress
