Zëdhënësja e Komisionit Evropian, Eva Hrncirova ka deklaruar këtë të hënë se Evropa po monitoron nga afër një rast të dyshuar të murtajës pneumonike në Rusinë lindore, pas vdekjes së një punëtoreje laboratori.
“Jemi në dijeni të raporteve në lidhje me incidentin në laborator në Rusi, që me sa duket përfshin një murtajë që shkakton patogjen. Jemi në kontakt me ekspertët tanë nga Qendra Evropiane për Parandalimin dhe Kontrollin e Sëmundjeve dhe monitorojmë nga afër atë që po ndodh”, tha Hrncirova.
Zyrtarët amerikanë i kanë thënë Radios Evropa e Lirë se po e monitorojnë situatën dhe u kanë kërkuar autoriteteve ruse të “ndajnë informacion të saktë shpejt dhe hapur”.
Një zëdhënës i Organizatës Botërore të Shëndetësisë tha se agjencia e shëndetësisë e Kombeve të Bashkuara ishte në dijeni të raporteve të vdekjes dhe po përpiqej të verifikonte detajet.
“Bazuar në informacionin jozyrtar të disponueshëm, rreziku i shëndetit publik për popullatën e përgjithshme duket të jetë i ulët”, tha zëdhënësi, duke shtuar se vlerësimi i rrezikut do të përditësohet sapo të ketë më shumë informacion në dispozicion.
Një punonjëse 28-vjeçare në Institutin Kundër Murtajës në Irkutsk të Siberisë dhe Lindjes së Largët u sëmur dhe vdiq nga ajo që dyshohet se ishte një rast i murtajës pneumonike.
Rospotrebnadzor, organi mbikëqyrës i konsumatorit në Rusi, nuk e ka konfirmuar shkakun e saktë të vdekjes, duke thënë vetëm se punonjësja vdiq nga “pneumonia me etiologji të panjohur”. Më shumë se 200 persona janë vendosur nën vëzhgim pas vdekjes së saj.
Ai shtoi se asnjë mikroorganizëm i lidhur me aktivitetet e saj profesionale nuk u identifikua në mostrën nga pacientja e ndjerë.
Guvernator i rajonit të Irkutskut, Igor Kobzev tha se autoritetet kishin identifikuar, ekzaminuar dhe vendosur nën mbikëqyrje mjekësore të gjithë personat që kishin rënë në kontakt me pacienten. Asnjë punonjës tjetër në institutin kundër murtajës nuk e ka vizituar mjekun gjatë ditëve të fundit, shtoi ai.
Murtaja është një sëmundje infektive e shkaktuar nga bakteri Yersinia pestis, që zakonisht gjendet te gjitarët e vegjël dhe pleshtat e tyre, sipas OBSH-së. Ajo ka munguar në Evropë për më shumë se 50 vjet, megjithëse vazhdon të shfaqet në Amerikë, Afrikë dhe Azi.
Murtaja pneumonike është forma më ngjitëse pasi mund të kalojë nga një person te tjetri nëpërmjet grimcave të frymëmarrjes. Inkubacioni i saj është relativisht i shkurtër, me simptoma – duke përfshirë gulçim dhe kollë – që shfaqen zakonisht brenda 24 orëve pas infeksionit. Murtaja pneumonike është gjithmonë fatale nëse nuk trajtohet.
