Mungon një lider, mbrojtja nuk është më e pathyeshme, kriza e Juventusit në 5 pika
“Gazzetta dello Sport” analizon ecurinë e dobët e bardhezinjve, duke e përmbledhur në pesë pika. Analiza nis nga mbrotja që në ndryshim nga vjet, këtë sezon “fut ujë” e deri tek sulmi ku ndihet mungesa e Tevez.
Mbrojtja?
Gola të pësuar në tre javët e para të kampionatit 2014-15: asnjë. Golat e pësuar në tre ndeshjet e këtij edicioni të Serie A: katër. Ishte pika e fortë e bardhezinjve, por tashmë është kthyer në një pikë të dobët: ti shënosh Juventusit tashmë është diçka e arritshme, dhe kjo vlen edhe për Përparim Hetemaj q[ nuk festonte një gol të shënuar në Serinë A që nga 2 prilli i 2011-s, 134 ndeshje më parë. Po mos të kishte qenë Buffon, që në ndeshjen e së shtunës bëri mrekullia, bilanci do të ishte akoma më negativ…
Lideri i munguar
Po kthehet në një fiksim, por tashmë konfirmohen frikat më të mëdha të tifozëve bardhezi gjatë kësaj vere: me largimet e Pirlos, Tevez, Vidal…kush do të marrë timonin drejtues të ekipit? Nga Pogba te Morata, nga Marchisio te Dybala, nuk asnjë që të marrë përsipër një përgjegjësi të tillë, Për momentin asnjë nga lojtarët e Allegrit nuk duket i aftë për “ta marrë mbi shpatulla” ekipin.
Sturaro
70 minutat e luajtura ndaj Real Madridit në Champions League sezonin e kaluar, u dukën se do t’i hapnin dyert e një të ardhmeje si protagonist. Më pas një seri paraqitjesh zhgënjyese, një kampionat europian U-21 për t’u harruar, ndërkohë që edhe ky fillim sezoni nuk ka nisur në mënyrën më të mirë. Nga lojtarët më të dobët në ndeshjen e së shtunës ndaj Chievos, ku u bë edhe objektivi i vërshëllimave të tifozëve, Sturaro u zëvendësua nga Cuadrado, i cili ndryshoi ndeshjen.
Mungesa e Tevez
Dybala shënoi edhe këtë ndeshje (golat e këtij fillim kampionati për Juventusin mbajnë firmën e tij), por në fushë nuk ishte vendimtar. Akoma më pak bindi Morata, një fotokopje e keqe e “bomberit” të sezonit të kaluar: spanjolli dhe ish-sulmuesi i Palermos kanë vështirësi të kombinojnë dhe të gjejnë njëri tjetrin. Po Mandzukic? E nis nga stoli dhe zgjedhja e Allegrit nuk duket shumë e zgjuar, teksa Alex Sandro vazhdon të japë krosime të shumtë, që askush nuk mund ti shfrytëzojë në zonë, por kur futet në fushë nuk është se ndryshon gjë. Duhen gola dhe menjëherë.
Cuadrado dhe blerjet e reja
E vetmja notë pozitive vjen nga merkato verore: Cuadrado, Alex Sandro dhe Hernanes bëjnë të shpresosh për mirë. Kolumbiani hyn në fushë në 20 minutat e fundit dhe kthehet menjëherë në njeriun e ndeshjes: vrapon, driblon dhe “çmënd” mbrojtjen e Chievos dhe nuk është rastësi që edhe 11 metërshi i fituar nga Juventusi vjen nga një aksion i tiji në zonë. Ndërkohë, Alex Sandro, më në fund i aktivizuar nga minuta e parë bën atë që duhet: vrapon si i marrë, driblon kundërshtarët dhe jep një mal me krosime, gjynah që askush nuk është aty për ti shfrytëzuar. Më pak brilant “Profeti”, por që ka meritën që godet portën në çdo rast që i jepet.
