Presidenti i zgjedhur Ilir Meta sqaroi në një konferencë për mediat mungesën e ambasadorëve të akredituar në Tiranë, gjatë seancës së djeshme parlamentare ku meta u zgjodh president me 87 vota pro dhe vetëm dy kundër.
Ai tha se mungesa e kryediplomatëve në seancë është përgjegjësi e tij pasi zgjodhi që ata të jenë të pranishëm në mbledhjen e Kuvendit për betimin e kreut të ri të shtetit, seancë që mbahet më 24 korrik kur mbaron edhe mandati 5-vjeçar i Bujar Nishani.
“Është përgjegjësi imja për mungesën e tyre pasi mendova se ishte e tepërt prania e tyre dje duke qenë se ishte një seancë normale dhe kur dihet që ata duhet të jenë të ftuar si gjithmonë në traditën, në seancën e betimit në parlament. Çfarë do bënin ambasadorët atje?”, – tha Meta.
Ndërkohë gjatë fjalës së tij ai nuk la pas falënderimet për urimet e shumta që mori menjëherë pas zgjedhjes së tij president.
“Unë falënderoj ambasadën e SHBA për urimin e saj. Shumë ambasadorë dhe ambasadore që më kanë dërguar menjëherë mesazhe urimi pas zgjedhje. Falenderoj shumë personalitete të vendeve partnere që më kanë uruar me gjithë mënyrat e tyre, dhe gjithë udhëheqësit shqiptarë në rajon, Kosovë, Maqedoni mal i zi dhe kudo, mos kini asnjë merak për këtë çështje”, theksoi Meta.
