Një vajzë 25-vjeçare u deklarua fajtore nga Gjykata e Tiranës si autore e shfrytëzimit për prostitucion e të paktën dy vajzave në kryeqytet e qytete të tjera të vendit. Sipas Gjykatës, Armonela Qama, në bashkëpunim me të bashkëpandehurin Ledian Gjoni, kishin rekrutuar si prostituta dy femra, të cilave u siguronin edhe klientët. Më tej Gjoni i dërgonte vajza te klientët dhe pas përfundimit të “misionit”, ndanin fitimet e siguruara në bazë të pagesave që ishin bërë.
Sipas Gjykatës, të pandehurit kishin shfrytëzuar faktin që dy vajzat që pranuan të prostituonin ishin në një gjendje të vështirë ekonomike. Qama dhe Gjoni janë vetëm dy nga të arrestuarit e operacionit policor “Rekrutimi” në tetor të vitit 2016.
Procesi gjyqësor ndaj Armonela Qamës dhe Ledian Gjonit përfundoi pak ditë më parë. Ata u deklaruan fajtorë për akuzën e “shfrytëzimit të prostitucionit” dhe u dënuan përfundimisht me nga 4 vjet e 8 muaj burg. Në të njëjtën dosje u fajësua edhe motra e të pandehurës Qama, 23- vjeçarja Ina Qama.
Ajo u fajësua për “veprime që pengojnë zbulimin e të vërtetës” dhe u dënua me gati 1 vit burg. Sipas Gjykatës, Ina Qama kishte penguar zbardhjen e ngjarjes, për shkak se, pas arrestimit, kishte porositur një prej vajzave të shfrytëzuara të mos fliste. Gjykata urdhëroi lirimin e saj nga qelia, për shkak se dënimi ishte konsumuar me kohën e paraburgimit. Ndërsa i pandehuri Ardit Sh. u dënua me 1 vit burg për akuzën e “moskallëzimit të krimit”.
SHFRYTEZIMI
Sipas vendimit të Gjykatës së Tiranës, procedimi penal ndaj të akuzuarve ka nisur pas një informacioni të siguruar në rrugë operative nga policia se shtetasja Maria Th. ushtronte prostitucion në vende të ndryshme në Tiranë. Nga hetimi ka rezultuar se Maria Th. dhe Alma P. shfrytëzoheshin për prostitucion nga Armonela Qama dhe Ledian Gjoni. Ato kryenin marrëdhënie seksuale kundrejt pagesës me klientë të ndryshëm në Tiranë, si dhe në qytetin e Fierit dhe në një lokal të muzikës tallava në zonën e Patosit.
ARRESTIMI
“Në datën 2.10.2016, shtetasit Ledian Gjoni, A.Sh. Alma P. dhe Z.H. janë kapur në flagrancë në Kukës. Lediani i kishte siguruar dhe dokumente të falsifikuara për të ushtruar prostitucion shtetases Alma P. Transporti i Almës po bëhej nga shtetasi Z.H., me profesion taksist.
Nga hetimi doli se taksisti nuk kishte asnjë lidhje me ngjarjen. Shtetasit Ledian Gjoni, Ardit Sh. dhe Z.H. janë arrestuar në flagrancë, kurse shtetasja Alma P. është pyetur më pas nga policia. Shtetasja Armonela Qama është ndaluar me iniciativë, pasi kishte rrezik ikjeje.
Kjo shtetase është drejtuesja e veprimtarisë në fushën e prostitucionit, kurse shtetasja Ina Qama ka kryer veprime që pengojnë zbulimin e të vërtetës. Në 2.10.2016, ajo ka qenë së bashku me Armonelën dhe shtetasen Maria Th. Ina Qama është kapur në rrugën “Loni Ligori” dhe është personi i cili ka deformuar të vërtetën, duke i thënë Marias që të mos fliste. Ky fakt del dhe nga deklarimi i shtetases Maria Th.”, thuhej në vendimin e Gjykatës.
PERGJIMI AMBIENTAL
Nga përgjimi ambiental i datës 3.10.2016 del se të dyshuarit i kanë kryer veprat penale për të cilat janë akuzuar. Nga ky përgjim del dhe veprimtaria e paligjshme e shtetasve Ledian Gjoni dhe Armonela Qama, që në përgjim i thërrasin shkurt “Nela”.
Nga përgjimi konfirmohen edhe dëshmitë e të dëmtuarave që janë shfrytëzuar. Vetë Armonela Qama e ka pranuar faktin se ka pasur kontakte dhe lidhje me vajzat e shfrytëzuara. /Panorama
ma.me
