Dështon seanca e pajtimit mes 14-vjeçares Kajtazi dhe prindërve të saj, vajza nuk pranon të rikthehet në shtëpi. Seanca e pajtimit mes 14-vjeçares Kajtazi dhe prindërve të saj, e zhvilluar në Gjykatën e Durrësit, ka dështuar. Më herët kjo gjykatë kishte vendosur një urdhër mbrojtjeje prej 21 ditësh për 14-vjeçaren, pasi nuk pranoi të kthehej në shtëpinë e prindërve.
E ndërsa u dërgua në një qendër rezidenciale, ishte dhe afati i seancës së pajtimit, por prindërit kanë mbetur të zhgënjyer, pasi vajza e tyre përsëri nuk ka pranuar të kthehej në shtëpi. Nisur nga këto arsye, gjykata rivendosi një tjetër urdhër mbrojtjeje prej 6 muajsh për të miturën. 14-vjeçarja do të strehohet në një qendër sociale në Tiranë.
Dy motrat Kajtazi, Orialda dhe Klevisa u arratisën më 15 korrik të këtij viti pasi helmuan prindërit, dogjën shtëpinë dhe vodhën kursimet e familjes. Ato u kapën nga policia vetëm një muaj më pas. Ndërkohë motra e madhe, Orialda ndodhet nën masën e sigurisë “arrest në burg”.
