Në kuadër të ligjit antimafia, prej më shumë se një viti motra e ish-kreut të Bandës së Durrësit, Lulzim Berisha, është nën hetim për pastrim parash.
Ky fakt konfirmohet për Report Tv nga burime pranë Prokurorisë së Përgjithshme, të cilat sqarojnë se ka dyshime të forta se Luljeta Berisha ka pastruar miliona dollarë.
Ndërkohë gjatë seancës së fundit gjyqësore ndaj Emiljano Shullazit, doli në dritë një tjetër detaj.
Luljeta Berisha, motra e Lulzim Berishës, ka marrë para borxh nga biznesmeni, Ylvi Beqja.
Ky i fundit është në proces gjyqësor me Emiljano Shullazin, të cilin e akuzon se i ka zhvatur përmes presionit shuma të konsiderueshme parash.
Mësohet se Ylvi Beqja është thirrur nga Prokuroria e Durrësit për të dhënë dëshminë e tij për këtë çështje.
Nga verifikimet e prokurorisë rezulton se Luljeta Berisha nuk e justifikon pasurinë që zotëron.
