Moti i kthjellët do të zgjasë vetëm pak ditë, duke iu lënë vendin sërish reshjeve të shiut dhe erërave të forta, nga mesi i kësaj jave. Këtë e bën të ditur për Report Tv meteorologu i Institutit të Gjeoshkencave, Metodi Marku.
Për mikrofonin e Report Tv, meteorologu njoftoi se këto dy ditë do të jenë të kthjellëta, ndërsa nga e mërkura do të rikthehen reshjet e shiut dhe erërat e forta, të cilat pritet të zgjasin deri në fundjavë.
“Kjo situatë ishte në përmasë më të ulët se ajo e fundit të nëntorit. Presim përmirësim këtë javë, dy ditët e para të kësaj jave do të kenë mot të kthjellët, pastaj do të ketë ndryshime. Priten reshje nga e mërkura deri të dielën.
Ndërkohë, një erë e fortë pritet gjatë ditës së mërkurë dhe të enjte. Pjesa e dytë e kësaj jave do të dominohet nga vranësirat, shoqëruar dhe me reshje. Reshjet priten të jenë më të pakta se fundjava që lamë pas”, tha meteorologu Marku.
