Një traget me 77 persona në bord nuk po ankorohet dot në portin e Vlorës për shkak të motit të keq. Era e fortë por edhe dallgët e shumta të krijuara në det ka bërë që trageti të dalë në radë.
Report Tv mëson se trageti ishte nisur nga Brindisi i Italisë në orën 06:00 të mëngjesit të sotëm dhe ka mbërritur në Vlorë në orën 15:30, ndonëse ishte parashikuar që të mbërrite në 14:00, por ka patur vonesa.
Nga ana tjetër, trageti është nisur me vonesë edhe nga Brindisi i Italisë, pasi duhej të nisej në orën 22:00. Për rrjedhojë, 77 pasagjerët në bord kanë mbetur të bllokuar për rreth 20 orë.
Për shkak të motit të keq që ishte parashikuar, Kapitaneria Vlorë njoftoi një ditë më parë së është ndaluar lundrimi i mjeteve të vogla, por edhe anijeve të peshkimit deri në mëngjesin e 23 prillit.
/b.h
