Një burrë humbi jetën si pasojë e motit të keq që ka goditur bregdetin mesdhetar të Spanjës, duke shkaktuar përmbytje dhe probleme serioze në qarkullim.
Trupi i pajetë i tij u gjet të enjten në orët e para të mëngjesit në Olivella, rreth 40 kilometra në perëndim të Barcelonës. Sipas shërbimeve të emergjencës, burri po drejtonte një makinë, e cila u mor përpara nga ujërat e rrëmbyeshme të një përroi.
Zjarrfikësit e gjetën trupin rreth 500 metra larg vendit ku ishte gjetur automjeti, ndërsa policia e Barcelonës konfirmoi se bëhej fjalë për drejtuesin e mjetit.
Alarm i kuq në Barcelonë
Shërbimi meteorologjik spanjoll AEMET kishte vendosur për një periudhë zonat bregdetare të Barcelonës nën alarm të kuq, duke paralajmëruar për reshje të dendura dhe rrezik të lartë për përmbytje të menjëhershme.
Autoritetet u bënë thirrje banorëve në Katalonjë dhe Valencia që të kufizonin lëvizjet vetëm për rastet absolutisht të nevojshme dhe të ndiqnin udhëzimet e shërbimeve të Mbrojtjes Civile.
Kryeministri i Spanjës, Pedro Sanchez, në një postim në X, i përshkroi situatat si “veçanërisht të ndërlikuara”, duke u kërkuar qytetarëve të tregoheshin jashtëzakonisht të kujdesshëm.
Moti i keq shkaktoi probleme të mëdha edhe në Barcelonë. Disa stacione metroje u mbyllën, linjat e autobusëve ndryshuan itineraret për shkak të rrugëve të përmbytura, ndërsa probleme u raportuan edhe në rrjetin hekurudhor periferik.
Vonesa dhe anulime u shënuan gjithashtu në aeroportin e Barcelonës, i dyti më i madh në Spanjë për nga numri i pasagjerëve.
Shërbimet e emergjencës në Katalonjë morën më shumë se 850 telefonata të lidhura me motin e keq, ndërsa u thirrën për të ndërhyrë në mbi 500 incidente.
Reshje të dendura edhe në Valencia
Moti i keq shkaktoi probleme të konsiderueshme edhe në Valencia, një rajon që ende i ka të freskëta kujtimet e përmbytjeve katastrofike të vitit 2024, ku humbën jetën më shumë se 230 persona.
Në disa zona u regjistruan rreth 70 milimetra shi brenda vetëm 30 minutash. Shërbimet e emergjencës raportuan 478 incidente në provincë, shumica e të cilave kishin të bënin me dëme materiale, banesa të përmbytura dhe probleme në qarkullim.
Në qytetin e Valencias u pezullua funksionimi i të gjitha linjave të metrosë, ndërsa aeroporti qëndroi i mbyllur për disa orë. Sipas kompanisë menaxhuese AENA, gjithsej 12 fluturime u detyruan të devijonin drejt aeroporteve të tjera.
Stuhitë e fuqishme erdhën pas një shtatori jashtëzakonisht të thatë dhe një vere me temperatura rekord në Spanjë.
Shkencëtarët theksojnë se ndryshimet klimatike të shkaktuara nga aktiviteti njerëzor po rrisin intensitetin e stuhive në Mesdhe. Këto fenomene shfaqen tradicionalisht në lindje të Spanjës gjatë muajve të vjeshtës.
