Reshjet e dendura të shiut kanë shkaktuar probleme me qarkullimin mëngjesin e sotëm në qytetin bregdetar të Durrësit, ku janë përmbytur disa zona të qytetit.
Si pasojë e nivelit të lartë të ujit, disa rrugë janë të pakalueshme. Raportohet se është bllokuar kryqëzimi tek ‘Stadiumi’, rrethrrotullimi tek ‘Stacioni trenit’ dhe rruga ‘Taulantia’.
Situatë problematike paraqitet edhe në zonën e Shkozetit dhe atë të Spitallës. Përmbytjet në Durrës kanë sjellë vështirësi në lëvizjen e automjeteve dhe këmbësorëve.
Gjithashtu probleme janë regjistruar edhe në Delvinë ku si pasojë e motit të keq është shembur njëra këmbë e urës së Vanës mbi lumin Kalasë duke izoluar banorët.
Aktualisht ura është e pakalueshme, duke izoluar rreth 200 banorë të fshatit deri në riparimin e saj. Emergjencat ndodhet në zonë për të parë situatën dhe marrë masa.
Edhe në Gjirokastër përroi i Sopotit ka dalë nga shtrati në Lazarat. Emergjencat Civile janë në terren, ndërsa drejtori Fatri Brahimi shprehet se po punohet për normalizimin e kalimit të mjeteve dhe kalimtarëve. Mësohet se është izoluar lagja Lënxat, ndërsa në rrezik është edhe Kordhoca.
/a.r
