Temperaturat e ulëta disa gradë nën zero vijojnë të mbajnë ‘të pushtuar’ të gjithë territorin e vendit.
Në veri dhe verilindje temperaturat shkuan gjatë natës deri në – 25 gradë, duke shkaktuar vështirësi në qarkullimin e mjeteve, por edhe në furnizimin me ujë .
Moti parashikohet me vranësira mesatare dhe të dendura edhe gjatë ditës së sotme. Sipas meteorologëve, do të ketë reshje bore në pjesën veriore dhe lindore deri në kuota të ulëta. Deti gjatë ditës së sotme do të jetë i forcës 4 me lartësi vale 3.0 metër.
Ndërkohë akset rrugore kanë prani të ngricave në rrugë dhe në veri dhe verilindje kërkohet qarkullimi i mjeteve me zinxhirë.
Temperaturat e ulëta kanë sjellë probleme edhe në furnizimin me ujë të pijshëm dhe me energji për qytetarët. Në pjesën më të madhe të vendit tubacionet dhe depozitat janë ngrirë në tarracat e pallateve.
