Një krim horror mund të konsiderohet ngjarja në Shkodër, ku 69-vjeçari Bashkim Teli masakroi për vdekje me çekiç bashkëjetuesen e tij Suzana Shemuni pas një sherri. Ngjarja ka ndodhur në qendër të qytetit pranë rruges “Dervish Beg” në katin e katërt të një pallati.
Autori dhe viktima bashkëjetonin me njëri-tjetrin, ndërsa kishin mbetur të ve pak vite më parë të dy. Fqinjët thonë se ata njiheshin si çift shembullor dhe se shumica u thërrisnin ‘çifti i lumtur’ për shkak të harmonisë që kishin.
“Ata kanë ndenjur në pallatin tonë, në katin e katërt dhe me thënë të drejtën kanë qenë një çift i lumtur dhe dilnin shëtitke çdo ditë dorë për dore, madje unë i thërrisja shpesh ‘çifti i lumtur’ dhe nuk kam vënë re asgjë të dyshimtë. E ndjera më ka treguar edhe kohën kur i shoqi ishte shtruar në spital dhe përkujdesjen e saj. Unë di që ai ka qenë i martuar më përpara dhe ka edhe dy vajza. Ai ka nja 2-3 vjet që jeton këtu. Ata dilnin çdo ditë dhe dukeshin ë lumtur. Ky veprim nuk justifikohet”- thotë një nga fqinjët.
Ndërkohë një tjetër fqinje thotë se e ndjera ishte 7 fëmijë nga martesa e parë dhe ka vendosur kurorë me 69-vjecarin që t’i marrë pasurinë. Në një bisede për “BalkanWeb” me gazetarin Senad Nikshiqi, fqinja thotë se Bashkimin e njihte si burrë të ndershëm.
“Ata kanë vendosur kurorë kohët e fundit. Dje kanë dalë dorë për dore të dy. Unë jam 84 vjeç a më shkon mua të martohem. Gruaja vuri kurorë ajo se donte shtëpinë. Gruaja ka punuar në Itali mbante pleq e plaka dhe ju e dini si është kjo pune. E ndjera ka 7 fëmijë dhe u ka lënë të gjithëve shtëpi. Ka dashur të stabilziojë edhe fëmijën e shtatë dhe me i marrë pasurinë këtij. Bashkimin e njihja për burrë të mirë dhe të ndershëm”- tregon një tjetër fqinje.
