Nga Andi Malasi
Ardian Fullani, ish-Guvernatori i Bankës së Shqipërisë është kthyer në kryelajm së paku dy herë: Herën e parë kur i’u vunë prangat për akuzën e shpërdorimit të detyrës me pasojë grabitjen e 713 milionë lekëve nga Departamenti i Emisionit, dhe herën e dytë kur u shpall i pafajshëm nga gjykata.
Në të gjitha rastet e tjera ai ka qenë i parashikueshëm! Edhe kur mediat u pushtuan këtë të mërkurë nga lajmi se Ardian Fullani, na paska bërë padi në Gjykatë Administrative ndaj Kuvendit dhe Bankës së Shqipërisë!
“Më shkarkuan padrejtësisht nga detyra” thotë ai!
Prisni se ka akoma…!
Në rastin e parë, arrestimi i tij bëri bujë pasi askush nuk e mendoi se do shkohej te një “peshk” kaq i madh, edhe pse shumë kush e lexoi prangosjen e Fullanit në konferencën e tij të zakonshme për punët e bankës 1 javë para arrestimit.
Fullani kullonte i tëri në djersë!
Madje kur gazetarët nisën ta pyesin për çështjen e grabitjes së thesarit, filloi edhe t’i dridhej zëri!
A thua se kishte informacion se ndaj tij ishte gati urdhër-arresti, apo po kuptonte që rrethi po ngushtohej aq shumë sa nuk mund t’i shpëtonte përgjegjësisë. Unë mendoj se janë të dyja. Nuk duhej, por siç ndodh rëndom drejtësisë këtu i dekonspirohen hetimet, dhe sigurisht që ai ishte informuar. Dhe së dyti, informacionet e dala në media orientonin hetimet shumë lart, deri te “koka”.
Nuk vonoi shumë dhe djersët që dikur fshiheshin (të gjithë kujtojmë foton e dalë në media të Fullanit me djalin që në një festë fshinin djersët me para) me 500-she euro, nuk rezultuan të kota, dhe përmbushën pritshmëritë.
Fullani u arrestua!
Të gjithë u habitën jo me pa të drejtë për arrestimin e një “peshku” kaq të madh!
Nëse në këtë rast shumë-kush e humbi bastin dhe “peshku” i madh u arrestua, pritshmëria e publikut ndaj këtij sistemi drejtësie skandaloz u përmbush në gjykatë. Fullani u shpall i pafajshëm! Po, po! Edhe apeli nuk gjeti përgjegjësi penale dhe konfirmoi pafajësinë!
Ky është momenti i dytë që Fullani, deri diku bëri lajm! Edhe pse e gjithë ajo shumicë që vinte bast se ai kurrë nuk do të arrestohej, e priste këtë vendim nga “drejtësia”.
Në të gjithë këtë histori, lajmin e radhës (edhe pse nuk na bën më përshtypje ne shqiptarëve) e bëri Prokuroria! Shansi i fundit që prokuroria të mbronte veten në radhë të parë ishte rekursi në Gjykatën e Lartë, por që nuk u bë kurrë. Kryeprokurori Adriatik Llalla tha në një studio televizive se u pa e arsyeshme të mos shkohej në Gjykatën e Lartë pas vendimeve të shkallësë së parë edhe apelit. Prokuroria vendosi kshtu edhe pse sipas saj “me veprimet dhe mosveprimt e tij Fullani krijoi terren që të grabitej banka”.
Dhe kur Fullani i “lau duart” me drejtësinë, atij sigurisht që i’u hap rruga drejt pastrimit moral tashmë!
Këto vendime i hapën atij rrugën të padiste Bankën e Shqipërisë dhe Kuvendin me pretendimin se e kanë shkarkuar padrejtësisht nga detyra!
Ja pra, pse ish-Guvernatori tallet me drejtësinë dhe taksapaguesit që do të duhet të paguajnë kostot e gjyqeve madje!
Po po, kostot janë të qytetarëve! Ja pse padia e tij nuk ishte e papritur! Ata u grabitën, ata paguajnë sërish falë dhe vetëm këtij sistemi drejtësie aktual! Nëse ekziston një frazë e kryeministrit që mbështes plotësisht është “ta shkundim nga themelet këtë sistem drejtësie”! Ky është problemi i vërtetë, dhe nuk është Fullani apo “Fullanët” e tjerë.
Por prisni!
Nuk ka mbaruar! Mos u habisni kur Gjykata të dëmshpërblejë Guvernatorin!
Madje, nuk mbaron me kaq…!
Ka edhe një tjetër padi që është e pritshme tashmë. Jo vetëm “shkarkim i padrejtë nga detyra”. Vendimet e pafajësisë i hapin rrugën Fullanit të depozitojë një tjetër padi dhe sërish paguajnë qytetarët.
Ky sistem drejtësie i jep atij të drejtën të kërkojë dëmshpërblim edhe për burg të padrejtë, për aq sa qëndroi në qeli!
Mos u habisni në hapin e radhës, është i parashikueshëm, vetëm prisni…!
Çudia 3 ditë zgjat në Shqipëri thotë populli!
Taksapaguesit faturën, Fullani “pastrohet” e paguhet, çështja mbyllet, të gjithë të lumtur!
