Papa Françesku ka bërë thirrje për heqjen e bllokadës ndaj eksporteve të grurit nga Ukraina, duke theksuar se ushqimi nuk duhet të përdoret “si një armë lufte”.
Duke folur për audiencën e tij javore të mërkurën, Papa tha se po ndjek “me shqetësim të madh” situatën në portet e Ukrainës.
Jetët e miliona njerëzve varen nga eksporti i grurit, “veçanërisht midis vendeve më të varfra”, tha ai.
“Bëj një apel të përzemërt që të bëhet çdo përpjekje për zgjidhjen e kësaj çështjeje, për të garantuar ushqyerjen si një e drejtë universale e njeriut”, tha Papa.
“Ju lutemi, mos përdorni grurin, një ushqim bazë, si armë lufte”, shtoi ai.
Ukraina po punon për një “operacion detar të udhëhequr nga OKB” me marinat e vendeve partnere për të siguruar një rrugë të sigurt tregtare për eksportin e produkteve të saj bujqësore, tha të martën Ministri i Jashtëm ukrainas Dmytro Kuleba.
Presidenti i Ukrainës Volodymyr Zelensky tha më herët se 22 milionë tonë drithë, që përbën gati gjysmën e furnizimit të eksportit të grurit të Ukrainës, po frenohet nga bllokimi i rrugëve kryesore të eksportit nga Rusia.
Kremlini ka hedhur poshtë vazhdimisht akuzat se ka bllokuar furnizimet me drithë nga Ukraina dhe ka akuzuar Perëndimin për veprime që kanë çuar në këtë krizë.
g.kosovari
