“Morën 20 pleshtat dhe i futën në epruvetë”, Gjergj Hani shpjegon opozitën e Sali Berishës

Ish-kandidati përballë Lulzim Bashës për të drejtuar PD-në një vit më parë, Gjergj Hani, e ilustroi në studion e emisionit “Të Paekspozuarit” gjendjen e opozitës me eksperimentin e një universiteti amerikan me pleshtat, të cilët, pasi i futën në epruvetë, nuk arrinin më të kërcenin si më parë.

Pjesë nga biseda

Ylli Rakipi: Tani opozita është bërë copë-copë, siç e ke vënë re ti dhe më rehat se ç’ndihet Edi Rama në këtë vend, nuk është ndjerë njeri.

Denis Dyrnjaja: Edhe Basha rehat është.

Ylli Rakipi: Edhe Basha rehat është se ai pushtet nuk do. Tani si e sheh Gjergj Hani, ish-kandidat për kryetar të PD-së, këtë copëzim të opozitës?

Gjergj Hani: S’kish si të ndodhte ndryshe, zgjati shumë. Duhet të kishte ndodhur shumë kohë më parë. Kjo tregoi se kjo opozitë nuk ka qenë kurrë e vërtetë në të gjithë historinë e saj dhe koha e konsumoi.

Universiteti MIT në Boston ka bërë një eksperiment që do të thotë shumë për realitetin shqiptar. Pleshti kërcen 40 herë lartësinë e trupit të tij dhe këta të eksperimentit morën nja 20 pleshta dhe i futën në një epruvetë dhe i mbyllën, duke mos u dhënë mundësi të kërcenin as sa 20 herë lartiësia e trupit. Pleshtat e varfër u përpoqën 2-3 herë të kërcenin, por hasnin në kapak dhe refuzuan të kërcenin më aq sa kishin bërë më parë. Kur ua hoqën kapakun ata nuk dilnin dot nga epruveta sepse kërcenin deri aty ku kishte qenë kapaku.

Kjo është ajo që ka ndodhur me historinë e opozitës shqiptare të udhëhequr nga Sali Berisha, duke nisur nga viti 1990. Mungesa totale e qasjes me të vërtetat historike të krimet e këtij vendi, me pandëshkueshmërinë e krimeve dhe mungesës totale të aftësisë për të shkruar historinë e vendit, sollën këtë rezultat.

Ylli Rakipi: Po pse mbërritën në këtë pikë, thua ti? Ti vjen nga të persekutuarit, ke hequr të zitë e ullirit.

Gjergj Hani: Jo unë nuk jam i persekutuar. Unë e refuzoj këtë term.

Ylli Rakipi: Ti e refuzon sepse e kanë përdorur të tjerët?

Gjergj Hani: Jo. Për faktin e thjeshtë se nuk jam i persekutuar, unë e konsideroj veten kundërshtar të këtij rregjimi, jo i persekutuar. I persekutuar është dikush që e kanë futur në burg vetëm pse ishte i biri i filanit, apoo nipi i fistekut. Bëra zgjedhjen time në jetë, i dola për zot, nuk prita për medalje dhe nuk e bëra duke menduar se do të vijë një ditë se do t’i bie gjoksit për atë gjest. Ishte thjesht zgjedhja ime personale. Pra nuk e konsideroj veten të persekutuar.

/a.r