Alvaro Morata do të kthehet në Shqipëri tre vjet pas vizitës së parë, për t’u ndeshur me kuqezinjtë e De Biasit në “Loro Boriçi” të Shkodrës. Sulmuesi i Spanjës ruan përshtypje të këqija nga hera e parë në Shqipëri, për shkak të fushës ku ka luajtur. Më 18 nëntor 2013, Spanja U21, e drejtuar nga trajneri i sotëm i kombëtares, Lopetegui, fitonte 2-0 kundër Shqipërisë U21 në stadiumin e Elbasanit, që në atë kohë nuk quhej ende “Elbasan Arena” por “Ruzhdi Bizhuta” dhe nuk i ishte nënshtruar rikonstruksionit total.
“Kam luajtur më parë atje me U21 dhe ishte një ndeshje që dua ta harroj, me një fushë të tmerrshme”, thotë Morata për Shqipërinë. Në fakt, kuqezinjtë i bënë mjaft rezistencë formacionit kampion të Evropës, të ndihmuar edhe nga terreni, që sigurisht nuk i favorizonte mjeshtrat e mbajtjes së topit. Tre vjet më pas, shumë nga protagonistët e atij takimi do të ndeshen në një nivel më të lartë dhe në një stadium “fringo” të ri, me fushë të re e që përballoi me sukses edhe shiun pa fund të ndeshjes me Maqedoninë, por Morata nuk duket se ka informacion.
“Shqipëria do të jetë (transfertë) shumë e vështirë, sepse fusha dhe skuadra do t’i bëjnë gjërat një sfidë të vërtetë”, thotë sulmuesi i Real Madridit.
Një shprehje që nuk reflekton aspak të vërtetën, vetëm në mos e pastë fjalën që aty luajtën mbrëmë Kosova me Kroacinë, por vështirë që Morata të jetë në dijeni të këtij fakti…
d.i.
