Rocco Morabito, italian të cilin drejtësia e vendit të vet e kërkon prej më shumë se 20 vjet për shkak të trafikimit të drogës dhe aktiviteteve mafioze, është arrestuar të dielën në një hotel në Montevideo, ka kumtuar Ministria e Punëve të brendshme e Uruguait, transmeton Koha.net.
Morabito, “anëtar i Ndranghetes, mafi kalabreze, kërkohet që nga viti 1995”, e Interpoli për të kishte shpallur fletë arrestin e kuq për shkak se nga viti 1988 deri në vitin 1994, i përkiste organizatës kriminale që merrej me trafikimin ndërkombëtar të drogës, shtohet në kumtesë, e cila thotë se Morabito ka siguruar arritjen e drogës në Itali, shitjen e saj në Milano dhe se nga Brazili në vitin 1992 u përpoq të sillte 592 kg kokainë ndërsa në vitin 1993 edhe 630 kg të tjerë.
Rocco Morabito në 15 vjetët e fundit ka jetuar në Urugai në resortin Punto del Este, ku dhe zbulua kur e regjistroi vajzën e vet në shkollë të mesme me emër të vërtetë, përcjell Jutarnji list.
U konfirmua se shtetasi italian ishte pajisur me dokumente të Uruguait duke treguar pasaportën e Brazilit me emrin Francisco Capeletto.
Gjatë, arrestimit, policia sekuestroi një revole, një armë të ftohtë, 13 mobitelë, 12 kartela banke, dy automobila, pasaportën portugeze, një unazë dhe librezën e kursimit me dollarë. Deri në kërkesën e Italisë për ekstradim, Morabito do të qëndrojë në burgun e Uruguait për shkak të pajisjes me dokumente të rreme dhe vjedhjes së identitetit. (b.an)
