I riu Endri Zaja i cili katër ditë më parë aksidentoi me makinë një të moshuar italiane në Durrës dhe me pas u largua, u arrestua sot teksa ishte duke bërë plazh.
Ndërkohë që ai ishte duke shijuar diellin dhe detin, policia e kishte shpallur në kërkim edhe për dy vjedhje.
Në video duket momenti kur policët i kanë shkuar në plazh Zajës dhe e kanë arrestuar, ndërkohë që ai mbante veshur vetëm një palë pantallona te shkurtra.
“Ky shtetas më datë 15.06.2021, në lagjen nr.11, Durrës, duke drejtuar mjetin tip “Toyota”, ka aksidentuar shtetasen italiane A. G., 74 vjeçe, dhe më pas është larguar nga vendngjarja. Shtetësja A. G., pas mjekimit të marrë në spital është larguar në banesë.
Në vijim të veprimeve të kryera dyshohet se ky shtetas është autor i 2 vjedhjeve të ndodhura më parë, konkretisht: Më datë 10.06.2021, në Kameras, Durrës, dyshohet se ka vjedhur në dyqanin e shtetases V. M., një sasi vlere monetare dhe disa paketa cigare. Më datë 14.06.2021, në lagjen nr.13, Plazh, Durrës, dyshohet se ka vjedhur në marketin e shtetasit M. M”, thuhet në njoftimin e policisë./m.j
