Ish-futbollisti i Kombëtares, Edmond Kapllani, foli në Klan Neës, me moderatoren Viola Spiro, për ecurinë e Shqipërisë dhe humbjen me Poloninë.
Referuar disfatës në “play off”, Kapllani u shpreh se polakët shfrytëzuan momentet, diçka që Shqipëria nuk e bëri, pavarësisht rasteve për shënim.
“Ndeshjen e pashë, me emocion. Ishte një ndeshje e barabartë. Ato episodet që Shqipëria i kishte, duhet t’i shfrytëzonte më mirë. Në momentet kur Polonia na futi në presion, shënoi edhe gol. Ndeshja ishte 50-50. Polonia i shfrytëzoi momentet, ne jo. Kjo nuk na lejoi të luanim finalen ndaj Suedisë”, tha ai.
Kapllani u shpreh se bilanci i kuqezinjve me Silvinjon ka qenë pozitiv, ndërsa theksoi se kjo mënyrë e lojës së brazilianit na dërgoi në Europian dhe ishim shumë afër Botërorit.
“Në 2025, kishim 10 ndeshje, gjashtë fitore, dy humbje dhe dy barazime. Kjo do të thotë që bilanci nuk është negativ, por është pozitiv. Mënyra e lojës së Silvinjos na çoi në Europian dhe gati na çoi në Botëror. Duhet ta pranojmë lojën e tij. Ndeshjet i kemi fituar 1-0. Kemi qenë pragmatistë. Nuk pësojmë thjeshtë. I kemi lojtarët për gol.
Lufta jonë do të ishte me Serbinë dhe e fituam. Nuk mund ta shikojmë vetëm negativisht. Ne e pamë çfarë stadiumi kishte Polonia, janë 50 milionë banor. Kemi arritur në nivel që ne mund ta mposhtnim Poloninë. Unë e shikoj nivel shumë pozitiv. Nëse para 10-15 vitesh thonim që do humbnim ndaj Polonisë, këtë herë shkuam me vetëbesim në Varshavë. Nuk mund të shikojmë vetëm anën negative”, deklaroi Kapllani.
