“Presim rezultat pozitiv për anëtarësimin”. Kështu është shprehur paraditen e së martës kryeministri Edi Rama teksa ka dalë në një konferencë të përbashkët me Federica Mogherinin.
Kreu i ekzekutivit shqiptar tha nga Brukseli se vendi ynë ka dhënë rezultate dhe pritet të japë më shumë në vijim.
Takimi me shefen e Politikës së Jashtme të BE-së vjen pas një vizite të delegacionit shqiptar në Bruksel.
Mogherini:
“Është një kënaqësi për mua të mirëpres, përsëri, Kryeministrin Rama, në një moment veçanërisht të rëndësishëm për rrugën e Shqipërisë drejt BE-së. Nën lidershipin e tij, Shqipëria ka bërë një punë të jashtëzakonshme, veçanërisht në Reformën e Drejtësisë, luftën kundër drogës dhe korrupsionit, një punë që ne e mbështesim e që duhet të vazhdojë përpara dhe kjo është një punë që mund të hapë rrugën drejt hapave të mëtejshëm të procesit të integrimit në BE. Jam e lumtur që kam përsëri këtë mundësi për të diskutuar së bashku mënyrën se si këto hapa mund të shndërrohen në një opsion të vërtetë në fillim të vitit të ardhshëm”.
Rama:
“Faleminderit dhe është një kënaqësi si gjithmonë që të vij t’iu takoj, veçanërisht në këtë moment kur ne shpresojmë në një rezultat pozitiv të të gjithë përpjekjeve të përbashkëta me fillimin e negociatave të anëtarësimit. Jam shumë krenar që kam ardhur këtu me më shumë rezultate të mira dhe jam i sigurt që do të kemi edhe më shumë në muajt e ardhshëm”.
