Mjekët kardiologë kanë paralajmëruar qytetarët me sëmundje kardiovaskulare që të tregojnë kujdes të shtuar gjatë verës, pasi temperaturat e larta mund të rrisin ndjeshëm rrezikun e komplikacioneve.
Ministria e Shëndetësisë publikoi mesazhin e prof. asc. Daniela Teferiçi nga QSUT, e cila theksoi se popullata shqiptare renditet e para për sëmundshmëri dhe vdekshmëri nga këto patologji.
Ajo shpjegoi se faktorët e rrezikut si duhani, jeta sedentare, yndyrat e larta në gjak dhe diabeti dëmtojnë organizmin në afatgjatë, duke rritur rrezikun për sëmundje të zemrës.
“Rritja e temperaturave gjatë muajve të verës mund të përbëjë një sfidë serioze për pacientët me sëmundje kardiovaskulare,” tha Teferiçi, duke shtuar se personat me predispozitë gjenetike janë veçanërisht të rrezikuar.
Popullata shqiptare, nënvizoi mjekja Teferiçi siç dihet nga të dhënat dhe shifrat zyrtare, mban vendin e parë sa i përket sëmundshmërisë dhe vdekshmërisë nga sëmundjet kardiovaskulare.
“Faktorët e rrezikut, si duhani dhe jeta sedentare, bëjnë gradualisht dëmtimin e organizmit. Kjo ndodh sepse yndyrat e larta në gjak nuk të dhembin dhe nuk të shkaktojnë shqetësime të menjëhershme, por në afatgjatë shkaktojnë sëmundje. Diabeti gjithashtu nuk shkakton shqetësime fillestare, por është një nga faktorët kryesorë të rrezikut për sëmundjet kardiovaskulare, sepse dëmton enët e gjakut”, tha ajo.
Ajo nënvizoi se gjatë verës ndodh shpesh ulja e tensionit arterial tek pacientët që marrin mjekime, ndaj mjekët mund të rekomandojnë reduktim të dozave.
Ndër simptomat kryesore të problemeve kardiake përmenden dhimbja në gjoks që përhapet në shpinë apo në nofull, e shoqëruar me marrje fryme.
“Pacientët duhet të jenë korrektë me mjekimin, të shmangin ekspozimin në pikun e të nxehtit dhe të bëjnë modifikimin e mjekimeve vetëm në varësi të tensionit,” përfundoi ajo.
Ndër simptomat kryesore të problematikave të shtuara me zemrën, Teferiçi rendit dhimbjen në mes të gjoksit që përhapet në shpinë apo në nofull.
