Las Vegasi në SHBA përjetoi mbrëmjen e djeshme një prej sulmeve më mizore me armë, ku mbetën të vdekur 58 persona dhe u plagosën 515 të tjerë. Vrasja më masive në SHBA, për hetuesit mbart me vete shumë mistere që ndoshta nuk do të mund të zbardhen kurrë. Edhe pse ISIS ka reaguar duke marrë autorësinë e sulmit barbar, ngjarja për momentin nuk po hetohet si akt terrorist, pasi nuk ka të dhëna të besueshme që 64-vjeçari Stephen Paddock të ketë lidhje me Shtetin Islamik.
Por çfarë mund të kate shtyrë të moshuarin drejt një barbarie të tillë duke hapur zjarr me breshëri ndaj turmës me 22 mijë persona?
Hetuesit po kërkojnë të dhëna në të shkuarën e tij por konfirmohet se Paddock nuk rezulton person me precedentë penalë shkruan JavaNews. Ai jeton rreth 90 minuta larg Las Vegasit ku ka një banesë që e ka blerë 369 mijë dollarë dy vite më parë dhe ku kalonte jetën si pensionist. Ai jetonte atje së bashku me të dashurën, 62-vjeçaren Marilou Danley e cila nuk ka të dhëna ta ketë ndihmuar në vrasjen masive shkruan JavaNews.
Por nëse autori i masakrës i cili i dha fund jetës pas krimit nuk ka të shkuar kriminale, nuk mund të thuhet e njëjta gjë për babain e tij i cili ka qenë shumë i njohur për drejtësinë. Benjamin Hoskins Paddock, ishte në listën e më të kërkuarve të FBI në vitin 1969 kur u arratis nga burgu, dhe u kap vetëm 1 vit pasi u hoq nga lista. Ai njihet si grabitës serial bankash. I arratisuri ishte diagnostikuar si ‘psikopat’ dhe gjithashtu kishte ‘tendenca vetëvrasëse’. Në këtë drejtim po hetohet tashmë edhe i biri i tij që hyn në histori si autori i vrasjes më masive në SHBA.
Ai kreu vetëvrasje vetëm 10 minuta pas sulmit. Paddock u gjet i vdekur nga policia i rrethuar nga një arsenal armësh që përdori. Ai kishte licenca të gjuetisë dhe të peshkimit sipas të dhënave publike, si dhe licencën e pilotit të tij. Autoritetet druhen se ky krim mund të mbetet mister, pasi autori nuk jeton më, duke varrosur përgjithmonë edhe të vërtetat e tij rreth motiveve që e çuan drejt këtij akti barbar. Partnerja e tij mbetet një person që mund të zbulojë shumë, por deri tani nuk ka dhënë ndonjë informacion me vlerë./JavaNews/a.m.
