“Një tjetër mjet lundrues është goditur nga një sulm i dyshuar me dron.”, kështu deklaroi Global Sumud Flotilla në rrjetet sociale. “Nuk ka të plagosur.” Këtë herë e prekur ishte anija ‘Alma’.
“Nata e dytë, sulmi i dytë me dron,” thotë Melanie Schweizer, një nga koordinatoret e flotiljes që synon të dërgojë ndihma në Gaza.
Denoncimi: “Një sulm”
Ishte pak pas mesnatës, deti ishte i qetë në afërsi të portit tunizian Sidi Bou Said. Në bordin e anijes ‘Family’, ku ndodhej komiteti drejtues i Global Sumud Flotilla, aktivisti portugez Miguel Duarte ngre kokën, trembet dhe tërhiqet mbrapa. Shfaqet një dritë e papritur, dhe më pas dëgjohet një shpërthim. Në bord përhapet panik.
“Isha në kuvertë, në pjesën e pasme të anijes”, rrëfen kreu i misionit të Sea-Watch, “dhe pashë një dron që qëndronte pezull rreth 3 ose 4 metra mbi kokën time. Qëndroi disa sekonda mbi një grumbull jelekësh shpëtimi, pastaj lëshoi një bombë.”
Më vonë, Greta Thunberg dhe Thiago Avila, nga shkallët e teatrit bashkiak në Tuniz, denoncuan një sulm të qëllimshëm për të sabotuar misionin humanitar drejt Gazës. Sipas tyre, videot janë provë. Në njërën prej tyre shihet një objekt ndriçues që godet një anije; në tjetrën, filmuar nga një kamera sigurie mbi anijen ‘Family’, dëgjohet një zhurmë dhe më pas shpërthimi.
Mohimet dhe ekspertiza
Roja Kombëtare e Tunizisë mohoi në mënyrë kategorike versionin e aktivistëve, duke thënë se sipas hetimeve paraprake “asnjë pajisje nuk është zbuluar”, dhe se zjarri mund të jetë shkaktuar nga një bisht cigareje.
Edhe Andrea Gilli, profesor i studimeve strategjike në Universitetin e St. Andrews në Skoci, shprehu dyshime mbi versionin e dronit: “Në pamjet që pashë”, shpjegon ai për gazetën Corriere Della Sera, “drita e fortë nuk përputhet me një dron. Dronët nuk lëvizin aq ngadalë. Goditja nuk shkakton asnjë lëkundje të anijes, kamera nuk lëviz, nuk thyhet asnjë xham. Për më tepër, objekti ndjek një trajektore parabolike, kur duhet të ishte e drejtë.”
Sipas tij, mund të ketë qenë një flakadan sinjalizues i lëshuar nga vetë anija apo nga një mjet tjetër aty pranë, brenda një rrezeje prej 100-200 metrash.
Pavarësisht mohimimeve, anëtarët e flotiljes flasin për “akte agresioni që synojnë të intimidojnë dhe sabotojnë misionin tonë paqësor për të thyer bllokadën e Gazës”, dhe akuzojnë Izraelin.
“Askush tjetër nuk ka interes të ndalojë nisjen e flotiljes, përveç shtetit pushtues,” thotë aktivisti palestinez Saif Abukeshek.
Në të njëjtën linjë, Francesca Albanese, raportuese speciale e OKB-së për territoret palestineze të pushtuara, deklaroi mes duartrokitjeve: “Nuk do të çuditesha nëse do të ishte Izraeli. Qeveritë europiane duhet jo vetëm të mbrojnë pjesëmarrësit e Global Sumud, por të rrisin presionin për të ndaluar gjenocidin.”
Edhe Spanja dhe Belgjika kërkuan hetime të plota mbi ngjarjen.
Reagimet dhe protestat
Nga Italia, një letër drejtuar kryeministres Giorgia Meloni dhe ministrit të Jashtëm Antonio Tajani, e firmosur nga rreth 100 punonjës italianë të institucioneve të BE-së (pjesë e rrjetit EUStaff4Peace), kërkon që Marina Ushtarake ose Roja Bregdetare italiane të shoqërojnë anijet e aktivistëve drejt Gazës. Por kjo kërkesë është shumë larg qëndrimit të qeverisë italiane.
Ministri Tajani përsëriti dje: “Ka mënyra më të sigurta për të dërguar ndihma për popullsinë civile të Gazës. Italia ka shpërndarë mijëra ton ushqime.”
Ai shtoi se është në kontakt me homologun izraelit Sa’ar për të garantuar mbështetje konsullore për shtetasit italianë nëse dhe kur mbërrijnë në territorin izraelit, dhe se respekton pjesëmarrjen e deputetëve italianë në mision.
Pavarësisht gjithçkaje, misioni i flotiljes nuk ndalet. Mijëra vetë dolën në protesta në shumë qytete italiane, nga Torino në Bolonjë e deri në Milano.
Në Romë pati tensione mes protestuesve dhe policisë: një grup tentoi të arrinte në rrugën e unazës, por u ndalua me ndërhyrje nga forcat e rendit. “Nëse ndalojnë flotiljen, ndalojnë gjithçka,” ishte slogani kryesor i protestuesve.
Lëvizja ndërkombëtare “Global Movement to Gaza” njoftoi se anijet e fundit do të nisen së shpejti nga Sicilia.
Shkrim nga Corriere Della Sera
