Misteri i zhdukjes së avionit të linjës “Egypt Air” vazhdon. Rrënojat e tij u gjetën në ishullin grek Karpathos, në lindje të Kretës. Ekipet egjiptiane dhe greke të kërkimit arritën të dallonin disa objekte si xhaketa shpëtimi dhe materiale plastike.
Të gjitha dyshimet e ekspertëve për zhdukjen e avionit “Egypt Air”, kanë një emërues të përbashkët: Terrorizmi ka gisht dhe jo ndonjë problem teknik i Airbusit A320.
Këtë e përforcon edhe fakti se inteligjenca franceze një javë më parë kishte paralajmëruar një rrezik të madh shënjestrimi nga ISIS, ndërsa kreu i këtij shërbimi në Francë, Patrick Calvar, kishte paralajmëruar për sulme që do të vijnë në forma të reja nga militantët.
Ndërkohë, një skenar terrorist nuk e mohoi as presidenti francez, Francois Hollande. Parlamenti francez votoi për të zgjatur gjendjen e emergjencës edhe 2 muaj të tjerë.
Ministri egjiptian i Aviacionit tha se probabiliteti është më i lartë që pas këtij skenari të fshihet ISIS dhe jo ndonjë defekt i avionit. Kreu i Agjencisë ruse të Sigurisë, Alexander Bortnikov, gjithashtu e mbrojti me forcë këtë argument.
“Kur do të bëheni të mprehtë dhe vigjilentë?”. Kjo ishte pyetja retorike e kandidatit republikan Donald Trump, i cili shtoi se nuk ka asnjë dyshim që ISIS mban vulën e zhdukjes së avionit.
TCH/d.i.
