Një ditë pas rastit të pazakonshëm, ku 5 fëmijë u paraqitën në News 24, policia e Elbasanit ka ndaluar mësuesen 57-vjeçare Majftoni Ago me akuzën për “shpërdorim detyre”.
Zyrtarisht policia e Elbasanit bën të ditur se Specialistët për Krimin Ekonomik dhe Financiar, në bashkëpunim me Prokurorinë e Rrethit Gjyqësor Elbasan bënë ndalimin e shtetases Mjaftoni Ago, 57 vjeçe, banuese në Cërrik, me detyrë mësuese kujdestare në shkollën 9-Vjeçare “7 Marsi”.
Ndalimi i saj u bë nga efektivat e policisë, pas njoftimit të bërë në median vizive, në Televizionin Neës 24, si dhe pas kallëzimit të bërë nga shtetasi I.H., 50 vjeç, banues në Cërrik.
Kjo shtetase, duke qenë kujdestare në shkollën 9-vjeçare “7 Marsi” Cërrik dyshohet të ketë shpërdoruar detyrën duke nxitur nxënësit e klasës së pestë që të shkonin për t’u ankuar pranë studios televizive të News 24, për problemet me mësuesit e kësaj shkolle.
Matrialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Shpërdorimi i detyrës”.
Dje një grup prej pesë fëmijësh mbërritën me taksi nga qyteti i Cërrikut drejt News 24 për të denoncuar dhunën e mësueses së tyre të quajtur Fatbardha Shabani. Ata thanë se i janë drejtuar ambienteve të News 24 pa dijeninë e prindërve. Nxënësit ishin në klasën e pestë në shkollën publike “7 marsi”, ndërsa mësuesja sipas tyre që i kishte dhunuar jepte mësim në klasën e katërt.
Nxënësit kanë rrëfyer se e kanë marrë rrugën në Tiranë me iniciativën e tyre dhe se mësuesja kujdestare u ka paguar lekët e taksisë. Ata ishin ankuar dhe në drejtori për dhunën por kërkesa e tyre nga drejtuesit e shkollës nuk u përfill.
Përpos dhunës, fëmijët shkojnë më tej në denoncimin e tyre pasi thonë se drejtoresha e shkollës kërkon të largojë nga puna mësuesen kujdestare Mjaftoni Ago. Ky vendim, thonë fëmijët është kundërshtuar edhe nga prindërit e tyre që përmes një peticioni i janë drejtuar edhe Drejtorisë Arsimore në Elbasan.
Pas kësaj kanë reaguar prindërit e fëmijëve. Ata bashkë me fëmijët e tyre i janë drejtuar komisariatit të policisë në Cërrik për të denoncuar ngjarjen. Pas kësaj, policia ka shoqëruar mësuesen kujdestare, Mjaftoni Ago, pasi ajo lejoi ardhjen e tyre në Tiranë të pashoqëruar.
Prindi i njërit prej nxënësve ka reaguar për këtë ngjarje, duke u shprehur se e ka mësuar nga televizioni se vajza e tij nuk ishte në shkollë, Ilirjan Hida tha se përgjegjësi për këtë ka mësuese Mjaftoni Ago.
Ndërsa vetë mësuesja kujdestare Mjaftoni Ago tha se dje sapo kishte mbërritur në shkollë, nxënësit i kanë rrëfyer për dhunën e ushtruar ndaj tyre.
“Mbërrita me vonesë në shkollë, i gjeta nxënësit të përlotur. Nxënësit më rrëfyen se i kishte dhunuar një kolege. Shkuam të denonconin drejtoreshën në zyrën e arsimit”, deklaroi ajo.
BW/d.i.
