Qeveria miratoi sot Programin Kombëtar të depistimit të kancerit të qafës së mitrës në Shqipëri, programi i parë në nivel kombëtar për një prej tumoreve më të përhapura te gratë. Ky program kombëtar ka për qëllim identifikimin e hershëm dhe parandalimin e kancerit të qafës së mitrës.
Testimi me HPV që parashikohet të kryhet, i koordinuar nga Ministria e Shëndetësisë nëpërmjet Institutit të Shëndetit Publik, do të ofrohet falas për gratë e grupmoshës 40-49 vjeç, që është edhe grupmosha më e prekur nga kanceri i qafës së mitrës.
Me këtë program Kombëtar, shërbimet e organizuara të këshillimit dhe marrjes së mostrave për laborator kryhen pa pagesë për gratë e grupmoshës 40-49 vjeç, pranë qendrave shëndetësore në Shërbimet e Kujdesit Parësor, të cilat sigurojnë edhe informimin e grave mbi programin.
Shërbimet e diagnozës së mëtejeshme dhe të trajtimit eventual mjekësor kryhen pa pagesë për gratë e përfshira në program, në shërbimin spitalor publik për të gjitha gratë që rezultojnë pozitive në depistim.
Në Shqipëri kanceri i qafës së mitrës është kanceri i dytë më i shpeshtë pas kancerit të gjirit.
Mbi 100 gra diagnostikohen me këtë kancer dhe pothuaj 40% e tyre humbin jetën nga ky kancer çdo vit në vendin tonë. Kanceri i qafës së mitrës prek gratë e moshave të mesme.
Miratimi i këtij programi nga qeveria shqiptare është shumë I rëndësishëm sepse programi kombëtar I depistimit të kancerit të qafës së mitrës ka një potencial të lartë parandalimi.
Është programi më kosto-efektiv I depistimit të kancereve që ekziston sot në botë. Sepse duke e kapur në faza të hershme, parandalohet mbi 80% të vdekjeve të parakohëshme. Ky është një program i rekomanduar edhe nga Organizata Botërore e Shëndetësisë i finalizuar sot nga Qeveria Shqiptare.
/a.rada
