Dy të arrestuarit në Shqipëri për llogari të dosjes “Habilaj”, Nezar Seiti dhe Armando Koçerri, kane dale ditën e sotme përpara Gjykatës së Krimeve të Rënda për të mësuar masën e sigurisë ndaj tyre.
Armando Koçerri u arrestua në operacionin blic në Vlorë, ku në banesën e tij u gjetën 4 tonë kanabis, që dyshohej se do të trafikohej në Itali.
Po në atë operacion u arrestua edhe Nezar Seiti, një person i konsideruar si bashkëpunëtor i ngushtë i Moisi Habilajt. Nezar Seiti njihet si financues i grupit, ndërsa pritet që të ekstradohet pas kërkesës së palës italiane.
Seiti përmendet në përgjimet e Prokurorisë së Katanias ku më së shumti siguron mjetet e nevojshme për transport të grupit, si edhe ndan paratë dhe studion tregun e zi të kanabisit.
Për të ka dhjetëra përgjime dhe ka qenë mjaft aktiv pas vitit 2015, duke hyrë dhe dalë lirisht në shtetin italian. Ai ka pasur një rol organizativ në grupin e strukturuar kriminal. Ndërkohë, për Koçerrin ende dihet pak, por burimet thonë se ai mund të hetohet dhe procedohet në Shqipëri, pasi nuk rezulton të ketë gisht në veprimtarinë përtej detit.
Deri më tani, të dy të arrestuarit nuk kanë dhënë asnjë detaj përpara organeve të ligjzbatuese në lidhje me aktivitetin. Nga ana tjetër, në Vlorë ka nisur bllokimi i të gjitha pasurive të Habilajve dhe bashkëpunëtorëve të tyre. Dy prej tyre, Sabaudin Sulaj dhe Florian Habilaj, janë ende të lirë dhe po punohet për kapjen e tyre.
a.ç
