Kjo masë e paralajmëruar nga Ministrja e Financave Anila Denaj një ditë më parë në Report TV, është mirëpritur nga biznesi fason, i cili pritet të përfitojë nga ky vendim, duke qenë se garancia e tretë do të fokusohet tek ndërmarrjet eksportuese. Florian Zekja nga shoqata ProEksport Albania thotë se kredia duhet të jetë e ngjashme me garancinë e parë.
Kjo mbështetje e tretë buxhetore e cila ende nuk ka marrë formë përfundimtare sa iu takon kushteve dhe kritereve, por biznesi fason jep disa sugjerime, sipas tyre shteti duhet të dalë 100% garant për huanë dhe jo pjesërisht, pasi krijohen pengesa.
“Ne kërkojmë që të jetë me normë interesi më të ulët se 5%, normalisht nga 0-2% normë, të ketë një mbulim kolatererali nga ana e qeverisë 100%, sepse edhe nga kredia e parë po ashtu edhe e dyta kolaterali nuk u shfrytëzua 100%. E treta që duhet të përdoret jo vetëm për paga dhe për sigurime por edhe për investime, blerje të lëndës së parë apo rinovimin e teknologjisë që do e ndihmonte shumë biznesin fason dhe do e përshtaste me ofertat për veshjet sanitare por edhe për kontratat e reja që mund të kemi kohët e fundit”, deklaron anëtari i ProEksport Albania, Florian Zekja.
Kujdes i veçantë sipas Zekjas duhet të tregohet edhe në analizat e riskut që bëjnë bankat në momentin e aplikimit për kredi, pasi shumë biznese nuk e kalojnë këtë fazë.
“E rëndësishme do të ishte që analiza e riskut të ishte favorizuese për biznesin fason, pasi shumë biznese kanë mbetur tek analiza e riskut që bankat aplikojnë për dhënien e kredive”, tha Zekja.
Sakaq pandemia vijon të mbajë në gjendje kritike eksportet e sektorit fason. Në 9 muaj këto ndërmarrje kanë eksportuar 15.1 miliardë lekë më pak se një vit më parë, dhe rënia më e madhe e tregtisë është regjistruar me Italinë.
