Ministria e Kulturës ka shfuqizuar vendimin për rikonstruimin e monumentit 100 vjecar në qendër të Prishtinës, dhjetë muaj pasi e kishte miratuar këtë projekt, shkruan Koha Ditore.
Shteti kosovar duket se ka kthyer vendimin që objekti karakteristik me zbukurimet e stilit të neorenesancës e neobarokut të rrënohet e më pas të rindërtohet një i ri në bazë të gjendjes ekzistuese, duke ruajtur të gjitha elementet që paraqesin vlera.
I ndërtuar më 1925, objekti njihet si “Shtëpia e Llaziqit” më pas “Kafja e Mile Qorrit” përderisa tash shteti e mbron si shtëpi banimi me pronar Gazmend Abrashin, biznesmeni që e bleu atë vite më parë.
MKRS-ja e ka shfuqizuar vendimin në fund të procesit, tek pasi pronarit Abrashi i ishte dhënë pëlqimi se edhe projekti zbatues përputhet me projektin ideor. Ministri i Kulturës, Kujtim Shala, me rekomandim të Qendrës Rajonale të Trashëgimisë Kulturore në Prishtinë, është tërhequr nga vendimi që kishte nënshkruar në muajin gusht të vitit të kaluar. (b.an)
