E para që shprehu rezerva për këtë aspekt të pasqyruar në draftin “Për statusin e gjyqtarëve dhe prokurorëve”, ishte Ministria e Financave. Dikasteri mund të thuhet se u zu ngushtë nga shuma e fondit vjetor në fjalë. Përtej logjikës se “klasa e re e drejtësisë do të ketë paga më të larta, me synimin që të mos korruptohet”, pagat e propozuara nga ekspertët e huaj kanë bërë xhiron e medias.
Fakti është që drafti në vetvete, pasqyron përqindjet e rritjet, por jo vetë shumat. Mund të ketë patur edhe mosbesim nëse rrogat 3 deri në 5 mln lekë të vjetra janë reale, apo teprime të medias. Gazeta Dita ka botuar faksimilet e komunikimeve mes Financave dhe Kuvendit për këtë çështje, për të sqaruar çdo paqartësi.
“Sjellim në vëmendjen tuaj se nëse aplikohet skema që parashikon ligji bashkëme shtesat e vjetërsisë, paga bruto shkon mbi 500 mijë në muaj, dyfishi i rrogës më të lartë në Republikën e Shqipërisë” – thuhet ndër të tjera në materialin e MF.
Aktualisht, fondi për magjistratët është 1.8 miliardë lekë.
“Referuar këtyre të dhënave mbi pagën mujore të çdo magjistrati, të propozuar si më lart, rezulton se fondi i nevojshëm për paga dhe sigurimet e detyrueshme shkon në 4.5 miliardë lekë në vit, nga 1.8 miliardë që është aktualisht, ndërsa paga mesatare shkon nga 138 000 lekë/muaj në 330 000 lekë në muaj, pa përfshirë shtesën e pagës për vjetërsi”, thuhet në dokumentin konfidencial të Ministrisë së Financave.
Ndërkaq, Financat janë përballur edhe me një tjetër kosto që nuk mund të llogaritet. Janë pikërisht: benefitet si kredi të buta, trajtim për pensionet dhe shpërblime vjetore për magjistratët, të cilave nuk mund t’u bëhet një llogari e saktë. Po ashtu transferimi i përkohshëm i tij shton koston financiare me 1 milion e 300 mijë lekë në muaj, ndërsa njëherë në vit 85 më të mirët shpërblehen me një pagë të 13-të.
“Buxheti tërësor nuk mund të llogaritet saktë nga ne pasi nuk ka karakter të përhershëm”, thotë Ministria.
Financat kanë propozuar një rritje “më të arsyeshme të pagave”, por që gjithsesi për 985 punonjësit e sistemit, e çon në mesatarisht 2 milion e 70 mijë lekë pagën mesatare mujore të magjistratëve pa llogaritur kostot e fshehta. Kështu, Ministria propozon rroga që nisin nga ajo e Kreut të Gjykatës Kushtetuese, 2.6 milionë lekë të vjetra, te paga më “e ulët” e prokurorit apo gjykatësit të rrethi, 1.94 milionë lekë të vjetra, pa llogaritur të ashtuquajturat kosto të fshehura.
ma.me
