Trupat ruse bombarduan ditën e sotme kullën televizive në Kiev, duke lënë 5 persona të vdekur dhe duke plagosur 5 të tjerë.
Ministri i Punëve të Jashtme të Ukrainës, Dmytro Kuleba teksa ka dënuar këtë akt, ka sjellë në vëmendje se në këtë kullë, që ndodhet në zonën e quajtur “Babyn Yar”, nazistët gjatë vitit 1941 kanë vrarë mbi 33 mijë hebrenj. Kuleba shprehet se 80 vjet më vonë, nazistët rusë sulmuan në të njëjtin vend duke shkaktuar sërish viktima.
“Kulla televizive e Kievit, e cila sapo është goditur nga një raketë ruse, ndodhet në territorin e Babyn Yar. Më 29-30 shtator 1941, nazistët vranë mbi 33 mijë hebrenj këtu. 80 vjet më vonë, nazistët rusë godasin të njëjtën tokë për të shfarosur ukrainasit. E liga dhe barbare.”- shkruan Kuleba në postimin e tij në Twitter.
Zona e Babyn Yar është një zonë memoriale, e ndërtuar mbi varrin masiv më të madh në Evropë të Holokaustit, ku skuadrat naziste vranë më shumë se 33,000 hebrenj vetëm gjatë dy ditëve, në 1941.
/b.h
