Izraeli premton sulme “edhe më të dhimbshme” nëse Irani refuzon propozimin e SHBA-së.
Ministri izraelit i Mbrojtjes, Israel Katz, tha sot se nëse Irani refuzon një propozim që kërkon ndër të tjera që Teherani të heqë dorë nga “armët bërthamore”, Izraeli do të nisë sulme “edhe më të dhimbshme” kundër objektivave të reja.
“Irani është në një pikë kthese historike: njëra rrugë konsiston në heqjen dorë nga terrorizmi dhe armët bërthamore, në përputhje me propozimin e SHBA-ve, ndërsa tjetra të çon në humnerë. Nëse regjimi iranian zgjedh opsionin e dytë, shumë shpejt do të zbulojë se ka objektiva edhe më të dhimbshëm se ato që kemi goditur tashmë”, shtoi ai.
