Forcimi i bashkëpunimit me leverdi të ndërsjellë midis Kinës dhe Gjermanisë u shërben interesave dypalëshe dhe është zgjedhja e duhur për të dyja vendet, tha të hënën ministri i Jashtëm i Kinës Wang Yi.
Në një bisedë telefonike me ministrin e Jashtëm gjerman Johann Wadephul, Wang, u bëri thirrje Kinës dhe Gjermanisë të dërgojnë një sinjal pozitiv për mbështetjen e përbashkët të multilateralizmit dhe tregtisë së lirë, të rrisin besimin në zhvillimin e marrëdhënieve kino-gjermane dhe të luajnë një rol konstruktiv në zhvillimin e lidhjeve Kinë-BE.
Duke vënë në dukje se Kina dhe Gjermania janë ekonomi kryesore në botë dhe partnere të gjithanshme strategjike, kreu i diplomacisë kineze u shpreh që, përballë unilateralizmit dhe çglobalizimit, është e nevojshme që të dyja palët të forcojnë komunikimin strategjik, të shtojnë besimin e ndërsjellë dhe të thellojnë bashkëpunimin pragmatik.
Kina dhe Gjermania duhet të vlerësojnë përparimin e arritur deri tani, të nxitin një bashkëpunim dypalësh më të thellë e më të qëndrueshëm dhe të vazhdojnë të arrijnë rezultate të reja, tha Wang.
Duke theksuar se parimi i Një Kine është themeli politik i marrëdhënieve kino-gjermane, Wang shprehu shpresën që Gjermania do të ruajë dhe do të forcojë traditën e besimit dhe miqësisë së ndërsjellë me Kinën, do të respektojë parimin e Një Kine dhe do të ndërmarrë veprime konkrete për të mbrojtur marrëdhëniet dypalëshe, si edhe paqen e qëndrueshmërinë përgjatë Ngushticës së Tajvanit, duke krijuar kushtet e nevojshme për shkëmbime në nivel të lartë midis dy palëve.
Ministri i Jashtëm kinez vuri në dukje më tej që Kina e BE-ja janë partnere të gjithanshme strategjikë dhe duhet të shmangin luftën tregtare.
Ai shprehu gjithashtu shpresën që Gjermania do të ruajë qëndrimin racional e praktik, do të luajë një rol pozitiv brenda BE-së dhe do ta nxitë BE-në për të mbrojtur tregtinë e lirë, për të refuzuar proteksionizmin dhe për të qëndruar në rrugën e duhur të hapjes, bashkëpunimit, dialogut dhe konsultimeve.
Nga ana e tij, Wadephul tha se marrëdhëniet Gjermani-Kinë kanë ruajtur një ritëm të qëndrueshëm zhvillimi vitet e fundit.
Sipas tij, pala gjermane mirëpret forcimin e mëtejshëm të shkëmbimeve të nivelit të lartë me palën kineze, mbajtjen e raundit të ri të konsultimeve ndërqeveritare Gjermani-Kinë dhe thellimin e bashkëpunimit praktik në fusha si ekonomia e tregtia, duke vazhduar nxitjen e marrëdhënieve dypalëshe.
Pala gjermane i përmbahet fort politikës së Një Kine dhe ky pozicion nuk do të ndryshojë, tha Wadephul.
Duke vënë në dukje që situata aktuale ndërkombëtare po përballet me një sërë kërcënimesh dhe sfidash të reja, kryediplomati gjerman tha se Gjermania pret që Kina të shfrytëzojë ndikimin e saj në çështjet ndërkombëtare e rajonale dhe të punojë me Gjermaninë për të kërkuar rrugëzgjidhje.
Berlini mbështet BE-në dhe Kinën në trajtimin e duhur të dallimeve ndërmjet tyre nëpërmjet dialogut dhe është i gatshëm të luajë një rol aktiv në këtë drejtim, shtoi ai.
Të dyja palët gjithashtu shkëmbyen mendime mbi situatën në Iran dhe krizën në Ukrainë.
