Ministri i Jashtëm i Iranit, Abbas Araghchi, deklaroi sot se institucionet shtetërore në Iran po funksionojnë normalisht dhe se vendi “ka procedura kushtetuese” për të përballuar situatën e krijuar pas raportimeve të fundit.
Në një intervistë të dhënë për mediat ndërkombëtare, Araghchi tha se zgjedhja e një udhëheqësi të ri suprem mund të ndodhë shumë shpejt.
“Mund ta shihni zgjedhjen e një udhëheqësi suprem brenda një ose dy ditësh,” tha ai, duke nënvizuar se mekanizmat ligjorë të Republikës Islamike janë në funksion dhe se procesi kushtetues për pasardhësin është duke u ndjekur.
Deklarata e tij vjen në një moment tensioni të lartë, ndërsa vendi është përfshirë nga ngjarje dramatike politike dhe ushtarake. Autoritetet iraniane kanë formuar një këshill udhëheqës të përkohshëm që do të ushtrojë funksionet e liderit suprem deri në zgjedhjen e një pasardhësi të përhershëm nga organet përkatëse konstitucionale.
