Pas zhvillimit të Konferencës së 8-të Ndërqeveritare në Bruksel, Ministri për Evropën dhe Punët e Jashtme, Ferit Hoxha, ka vlerësuar progresin e rëndësishëm të vendit në procesin e integrimit evropian përmes një postimi në rrjetin social X.
Kryediplomati shqiptar bëri një krahasim kronologjik të “murit të zgjerimit”, duke kujtuar se nga tetori i vitit 2024 kur asnjë kapitull nuk ishte i hapur, Shqipëria arriti të hapte të 33 kapitujt në nëntor të vitit 2025.
“Muri i Zgjerimit – Ndryshimi po vjen. Më 14 tetor 2024, gjithçka për Shqipërinë ishte e kuqe. Asnjë kapitull i vetëm nuk ishte hapur. Njëmbëdhjetë muaj më vonë, më 17 nëntor 2025, gjithçka në murin e zgjerimit u bë e verdhë. Të 33 kapitujt u hapën.”
Sipas tij, pas kalimit me sukses të testit mbi IBAR-in, ngjyrat e këtij muri po ndryshojnë sërish drejt fazës së gjelbër, me synimin final për t’u bërë “blu” deri në vitin 2030. Hoxha theksoi se rruga drejt BE-së është e besueshme sepse bazohet në meritë, transformim të vërtetë dhe reforma të përditshme.
“Pas Konferencës së 8-të Ndërqeveritare mbi #BAR të mbajtur dje, testi më i madh deri më tani në procesin tonë të përshpejtuar të anëtarësimit, ngjyrat po fillojnë të ndryshojnë përsëri. Ato së shpejti do të fillojnë të bëhen të gjelbra, faza e fundit, përpara se të bëhen “blu” deri në vitin 2030.
E dimë mirë këtë: Rruga e Shqipërisë drejt anëtarësimit në BE është e besueshme vetëm kur fitohet, bazohet në meritë, bazohet në transformim të vërtetë dhe drejtohet nga një mentalitet vërtet evropian. Kjo është pikërisht ajo që po bëjmë.”
Në mesazhin e tij, ministri shprehu mirënjohje për Ekipin e Shqipërisë Evropiane, Komisioneren Marta Kos, Presidencën qipriote të Këshillit të BE-së (CY2026EU) dhe shtetet anëtare për mbështetjen e tyre. Në mbyllje, ai garantoi se vendosmëria e Shqipërisë nuk do të ndalet deri në përmbushjen e plotë të këtij rrugëtimi që të çon drejt Brukselit.
“Ajo që dikur dukej e largët, e paarritshme ose edhe e pamundur për shumë njerëz, tani po bëhet realitet: hap pas hapi, reformë pas reforme, angazhim pas angazhimi, çdo ditë, së bashku me partnerët tanë.
Faleminderit të gjithëve në Ekipin e Shqipërisë Evropiane! Faleminderit Komisioneres Marta Kos dhe kolegëve tanë në Komisionin Evropian për përkushtimin e tyre të jashtëzakonshëm;
Faleminderit Presidencës aktuale, CY2026EU, për angazhimin dhe lidershipin e saj të vërtetë;
Dhe faleminderit të gjitha Shteteve Anëtare për mirëkuptimin, mbështetjen dhe partneritetin e tyre, kërkues pikërisht sepse ka qenë i sinqertë.
Nuk do të ndalemi derisa puna të përfundojë, sepse për Shqipërinë, kjo është rruga jonë drejt së ardhmes sonë dhe të gjitha rrugët të çojnë në Bruksel.”
