Ministrja e Mbrojtjes Mimi Kodheli ka paditur për shpifje anëtaren e Këshillit Kombëtar të Partisë Demokratike Reila Bozdo.
Padia është regjistruar në Gjykatën e Shkallës së Parë më 1 dhjetor për “shkaktim dëmi”, çështje e cila do të shqyrtohet nga gjyqtari Asim Vokshi. Ministrja Kodheli kërkon që Reila Bozdo të përgënjeshtrojë deklaratën e dhënë nga selia e Partisë Demokratike në 7 nëntor të këtij viti. Bëhet fjalë për akuzat që Bozdo artikuloi kundër Ministrisë së Mbrojtjes se i ka dhënë tenderin për vënien në punë të pajisjeve për sigurinë detare, një dyqani celularësh në Rrugën e Durrësit.
Deklaratë e anëtares së Këshillit Kombëtar, Reila Bozdo dhënë më 7 nëntor 2015
Mimi Kodheli po konkurron turpshëm me Ilir Beqën për çmimin e parë në fushën e korrupsionit. Faktet e zbuluara nga kontrolli që është bërë në Ministrinë e Mbrojtjes, janë rrënqethëse, janë abuzim i paimagjinueshëm, që nxjerrin në pah hajdutërinë me cizme të Mimit të Ramës. Kontrolli ka zbuluar se tenderin për blerje, furnizim, instalim dhe vënie në punë të Sistemit të Integruar të Vëzhgimit të Hapësirës Detare, Kodheli ia ka dhënë një dyqani celularësh në rrugën e Durrësit. Pra dyqani i përzgjedhur i Kodhelit në rrugën e Durrësit do të monitorojë hapësirën detare, dhe po flasim pikërisht për rrugët nga ku kalon trafiku i drogës. Me një rrugë, dy punë bën Mimi. E para ndan 850 milionë lekë me dyqanin e celularëve në rrugën e Durrësit, e dyta garanton rrugët detare të trafikut të drogës. Dëmet ekonomike janë në qindra milionë lekë, dhe procedura është nëpërkëmbur sipas nevojave të Mimit. Kush kishte menduar se të paktën në fushën e mbrojtjes dhe sigurisë kombëtare këta nuk do ta kalonin vijën e kuqe, e ka gabim.
Këta po tregojnë se nuk ndalen para asgjeje kur është puna për zhvatur e përvetësuar fondet publike, taksat e shqiptarëve. Kjo është skema e Edi Ramës, e cili ka vendosur Mimin në tenderat e Ministrisë së Mbrojtjes, ngaqë e njeh mirë se ka dorë për këtë punë, nga përvoja e gjatë e bashkëpunimit. Ky është shteti i korruptuar dhe kriminal që ka ngritur Edi Rama. Nga njëra anë u merr shpirtin, qindarkën e fundit të pamundurve, i fut në burg për një kupon, nga ana tjetër ndan 850 milionë lekë me një dyqan celularësh për një shërbim të sigurisë kombëtare. Kjo hajdutëri, ky regjim kriminal i korruptuar, meriton përgjigjen e duhur nga qytetarët e vendit
