Ish-kryeministri Sali Berisha ka replikuar me një ndjekëse të tij në faqen e “Facebook”. Ndërsa komentuesja që thotë se është nga Shkodra e quan mitingun hapës të fushatës së PD-së më të dobëtin në historinë e PD-së, Berisha e i përgjigjet me mitingun e PS-së.
Sipas tij, njoftimi i PD-së për mitingun është bërë vetëm në “Facebook” dhe sërish ishin mijëra vetë, ndërkohë që në hapjen që bëri Rama tek Piramida nuk ishin as sa gjysma e pjesëmarrësve të PD-së.
Por në momentin kur komentuesja ‘e kryqëzon’ për listën e kandidatëve për deputetë në Shkodër dhe mungesën e Jozefina Topallit, Berisha nuk ka asnjë përgjigje.
REPLIKAT
Komentuesja: Unë personalisht e shoh si hapjen më të dobët në historinë e Partisë Demokratike dhe ju e dini shumë mire Doktor Berisha dhe kjo falë kryetarit të saj fatkeqësisht. Kjo vjen nga lista e dobët që ka bërë z.Basha! Unë si shkodrane dhe si demokrate që nuk kam lënë miting e fushatë pa u angazhuar jam krejt e bindur që më datë 25 qershor për mos me dhënë votë sepse kjo nuk është Partia Demokratike është Partia e Bashës ashtu si e quan vet Basha “Partia ime”… Është turp të përjashtohet nga lista Zonja e hekurt Jozefina Topalli…
Bindje politike nuk ndërroj sa të kem jete por kjo nuk është Partia Demokratike që do populli demokrat që kemi votuar pa asnjë kusht por keni me pa se Shkodrën s’keni me e pas tuajën më 25 qershor me këtë tradhti që i keni bërë Shkodrës e Shqipërisë!
Sali Berisha: Blerina njoftimi është bërë vetëm me Fb dhe në bulevard ishin dhjetëra mijëra vet siç tregojnë filmimet dhe jo të zmadhuara me lente si filmimet e Edi Ramës. Të siguroj se Edi Rama që bëri hapjen tek sheshi i Piramidës pavarësisht se kishte sjellë 80 autobusë nga rrethet nuk kishte as gjysmën e pjesëmarrësve të mitingut tonë të sotëm!
