Nga Ben Andoni
Ka qenë e tepruar ajo ritiradë batutash që kryeministri i vendit Edi Rama i ka shprehur kryetares së bashkisë të Shkodrës. Qesëndia dhe shpotia e tij therëse jo vetëm e ka ofenduar zonjën e parë të Shkodrës, por ka treguar realisht edhe sesi është diskursi i pushteteve në vendin tonë.
Veçse do të duheshin pak ditë, kur përfaqësuesja e Kosovës të ndeshej në qytet, që publiku i cili ishte renditur në krah të kryetares së Bashkisë, të kuptonte se primatët e pushtetit lokal në Shkodër i meritojnë fjalët dhe ndoshta edhe më të rënda.
Mungesa e administrimit të duhur shumëvjeçar, anomalitë e shumta në qytet, arroganca dhe politizimi në thelb i pushtetit lokal, e kanë lënë qytetin pa asnjë sens zhvillimi. Dhe, Shkodra e përmendur për bujari, gaz dhe alegri, por edhe modernitet na ka treguar të turpshëm para kosovarëve. Fillimisht për makutërinë e pronarëve të vegjël; së dyti, për organizimin e dobët, që rrjedh edhe nga strukturat e Bashkisë; së treti për mbetjen pas në sjellje, që na tregon krejt të pagdhendur dhe së katërti, për mungesën e empatisë ndaj vëllezërve kosovarë.
Shkodra e meriton stadiumin për kontributin e madh në futboll dhe Shqipëria i është mirënjohëse për atë që i kanë dhënë sportistët e saj në dekada, porse njerëzit e saj të pushtetit lokal, që prej kohësh të komunizmit e deri më tani, kanë treguar se janë meskinë dhe të cilëve u ka mbetur ora ende te përmendja stërbajate e qytetit të madh, që bënte tregti dhe njihej nga metropolet e njohura të Evropës dhe padyshim Marubi.
Në fakt, Shkodra më shumë se çdo gjë ka shpirtin e qytetarëve të saj të vërtetë, një komunitet gjithnjë e më vogël, që nuk rreh gjoksin vend e pa vend dhe që flet pak, e që i ka dhënë Shqipërisë si pakkush tjetër. Zërin e këtij komuniteti tashmë e mbysin kinset e shumta, që shkojnë rëndom deri në krye të pushtetit lokal dhe nuk bëjnë asgjë.
Kryetares së Bashkisë dhe pak herë do të ketë rastin që qyteti i saj të bëhet një qendër e një pelegrinazhi të tillë sportiv në stadiumin me emrin e të madhit Loro Boriçi, po aq pak kohë sa ajo vetë dhe vartësit e saj, u ka mjaftuar të tregojnë se janë aksidentalisht dhe thjesht zgjatime të politikës. Kjo shpjegon pse qyteti nën drejtimin e tyre ka aq shumë anomali, kjo shpjegon sepse Shkodra nuk di të mirëpresë si duhet, siç ndodhi këtë herë me kosovarët, kjo shpjegon edhe pse është ashtu kaotik si është.
Kryeministri Rama i foli vërtet keq znj.Ademi, porse në një takim tjetër si kreu i ekzekutivit të këtij vendi, do t’i duhej t’i fliste dy herë më ashpër (jo rëndë), për gjendjen që ajo e ka lënë qytetin. Pasi Shkodra, Dashnorja e Moteve, siç thoshte Migjeni, tashmë është një grua e mbaruar, që pret ta ndihin, njerëzit që vetëm i lakmojnë hiret dhe përfitojnë pa mëshirë mbi të. (Javanews)
